९ चैत्र २०७९, बिहीबार
९ चैत्र, काठमाडौ । पहिलो न्यायिक समितिको राष्ट्रिय सम्मेलनको उद्घाटन प्रधानमन्त्री पुष्पकमल दाहाल प्रचण्डले गर्ने भएका छन् ।
काठमाडौ महानगरपालिकाले पत्रकार सम्मेलन आयोजना गरी चैत १५ र १६ मा हुन लागेको कार्यक्रमको तयारी पूरा भएको र प्रधानमन्त्रीले उद्घाटन गर्ने तय भएको जानकारी दिएको हो ।
रविभवनमा आयोजित पत्रकार सम्मेलनमा महानगरकी उपमेयर सुनिता डंगोलले कार्यक्रममा सहभागिताका लागि ७५२ वटै पालिकालाई पत्र पठाइएको जानकारी दिईन् । उनका अनुसार हालसम्म साँढे ४ सय पालिकाले सहभागी हुने जानकारी दिएका छन् ।
सम्मेलन कमलादीस्थित प्रज्ञाप्रतिष्ठानमा हुनेछ । बैठकमा राम्रा र सफल अभ्यासबारे अनुभव आदानप्रदान, न्यायिक समितिको काममा एकरुपता कायम गर्ने लगायतका बिषयमा छलफल हुने बताइएको छ ।
सम्मेलनमार्फत काठमाडौ घोषणापत्र जारी गर्ने तयारी रहेको कार्यक्रममा जानकारी गराईएको थियो । त्यस्तै, न्यायिक समितिका काममा एकरुपताका लागि दिग्दर्शन समेत तयार गरिने तयारी छ।
कार्यक्रम अवधिभर खानाको व्यवस्था महानगरले गर्नेछ भने अन्य व्यवस्था सम्बन्धित पालिकाले गर्ने पत्रकार सम्मेलनमा जानकारी गराइएको थियो ।
प्रकाशित मिति: ९ चैत्र २०७९, बिहीबार
