१८ असार २०८१, मंगलवार
काठमाडौं । नेपाली कांग्रेसको पदाधिकारी बैठक बिहान नौ बजे सभापति शेरबहादुर देउवाको निवास बुढानिलकण्ठमा बस्दै छ ।
कांग्रेस–एमालेबीच सोमबार मध्यरातमा सत्ता साझेदारी गर्ने र सरकारको नेतृत्वको आलो–पालो गर्ने समझदारी भएको थियो । यद्यपि समझदारीलाई अन्तिम रुप दिन भने बाँकी छ ।
दुई दलका नेताहरुबीच मध्यरातसम्म भएको छलफलमा एमाले अध्यक्ष केपी शर्मा ओली सुरुका दुई वर्ष र शेरबहादुर देउवा बाँकी अवधि चुनावसम्म प्रधानमन्त्री बन्ने समझदारी भएको छ ।
नेकपा एमालेसँग सत्ता साझेदारीमा भएको समझदारीलाई अन्तिम रुप दिएर दुवै दलका शीर्ष नेताहरुले समझदारी पत्रमा हस्ताक्षर गर्ने तयारी छ ।
प्रकाशित मिति: १८ असार २०८१, मंगलवार
