१४ असार २०८१, शुक्रबार
काठमाडौं । संयुक्त राष्ट्रसंघले विश्व शान्ति स्थापनाका लागि नेपालले पुर्याएको योगदानको प्रशंसा गरेको छ । राष्ट्रसंघीय शान्ति विभागका प्रमुख एवं उपमहासचिव जीन पियरे ल्याक्रोइक्सले अमेरिकामा जारी चौथो संयुक्त राष्ट्रसंघीय प्रहरी सम्मेलनका क्रममा नेपाली प्रतिनिधिमण्डलसँगको भेट गर्दै विश्व शान्ति स्थापनार्थ नेपालको महत्त्वपूर्ण योगदान रहेको बताएका हुन् ।
भेटपछि ट्वीट गर्दै ल्याक्रोइक्सले भनेका छन्, ‘युएन पुलिस समिटमा नेपाली प्रतिनिधिमण्डलसँग उत्कृष्ट छलफल भयो । राष्ट्रसंघीय शान्ति स्थापना र राष्ट्रसंघीय प्रहरीमा नेपालको महत्त्वपूर्ण योगदानका लागि प्रशंसा गर्ने अवसर पाएकोमा आभारी छु ।’
युएनस्थित नेपाल मिसनले पनि उपमहासचिव ल्याक्रोइक्ससँगको भेटमा सहयोग अभिवृद्धिबारे छलफल भएको जनाएको छ । मिसनकाअनुसार नेपाली प्रतिनिधिमण्डलले डिपार्टमेन्ट अफ अपरेसन सपोर्टका उपमहासचिव अतुल खरेसँग पनि भेटेको छ । दुबै जनासँगको भेटमा राष्ट्रसंघीय प्रहरीमा सहभागिता तथा शान्ति स्थापनार्थ नेपाल र राष्ट्रसंघबीच सहयोगलाई सुदृढ बनाउने विषयमा छलफल भएको नेपाल प्रहरीका प्रवक्ता डिआईजी दानबहादुर कार्कीले जानकारी दिए ।
गृहसचिव एकनारायण अर्यालको नेतृत्वमा पाँच सदस्यीय नेपाली प्रतिनिधिमण्डल संयुक्त राष्ट्रसंघको प्रधान कार्यालय न्यूयोर्कमा जारी युनाइटेड नेसन चिफ अफ पुलिस समिटमा सहभागी छ । सम्मेलनलाई सम्बोधन गर्दै गृहसचिव अर्यालले राष्ट्रसंघीय प्रहरीमार्फत विश्व शान्ति र सुरक्षामा योगदानका लागि नेपाल निरन्तर प्रतिबद्ध रहेको बताए । उच्चतम प्रविधिको विकाससँगै द्वन्द्वको बढ्दो जटिलताका विषय उजागर गर्दै गृहसचिव अर्यालले द्वन्द्वका मूल कारणहरूलाई सम्बोधन गर्नुपर्ने आवश्यकतालाई जोड दिएका थिए ।
राष्ट्रसंघीय प्रहरी सम्मेलनमा भाग लिन गृहसचिव अर्यालको नेतृत्वमा नेपाल प्रहरीका आईजीपी बसन्त कुँवर, सशस्त्र प्रहरी आईजीपी राजु अर्याल, नेपाल प्रहरीका प्रवक्ता डिआईजी दानबहादुर कार्की र सशस्त्रका एसएसपी १० असारमा अमेरिका प्रस्थान गरेका थिए ।
प्रकाशित मिति: १४ असार २०८१, शुक्रबार
