११ फाल्गुन २०८०, शुक्रबार
काठमाडौं। सिद्धार्थ राजमार्गमा निर्माणाधीन सुरुङमार्ग निर्माण जारी रहँदा रातको समयमा राजमार्ग बन्द हुने समय लम्बिएको छ । सिद्धबाबा सुरुङमार्ग योजना बुटवलले एक सूचना जारी गर्दै थप ५० दिन रातको समयमा राजमार्ग बन्द रहने जानकारी गराएको हो ।
त्यस्तै, १६ पुसदेखि राजमार्ग राति १० बजेदेखि बिहान ४ बजेसम्म बन्द हुँदै आएको छ भने यसलाई दोस्रो चरणमा विस्तार गरी २७ चैतसम्म पुर्याइएको आयोजनाले जनाएको छ । पहिलो चरणमा ७ फागुनसम्म राजमार्ग बन्द रहने गरी निर्णय गरिएको थियो भने माघे सङ्क्रान्ति पर्वलाई लक्षित गरी दुई दिन राजमार्ग २४सै घण्टा खुला गरिएको थियो ।
त्यसैगरी, सुरुङमार्गको दक्षिण र उत्तरतर्फको पोर्टल, बाइपास टेल एक-दुई तथा स्लोप क्षेत्रको काम गर्दा बाटो साँघुरो हुने भएपछि आयोजनाले प्रशासनको सहयोगमा राजमार्ग बन्द गरी काम भइरहेको छ । यसबीचमा एम्बुलेन्ससहितका अत्यावश्यक क्षेत्रका सवारी साधन भने रोकिने छैनन् ।
प्रकाशित मिति: ११ फाल्गुन २०८०, शुक्रबार
