स्पेनिस ला लिगामा जिरोना पराजित

काठमाडौं। स्पेनिस ला लिगा फुटबलमा दोस्रो स्थानको जिरोना पराजित भएको छ । सोमबार राति भएको खेलमा जिरोना एथ्लेटिक विलबाओसँग ३-२ गोल अन्तरले पराजित भएको हो ।

त्यसैगरी, एथ्लेटिकका एलेजान्ड्रो रिमेरियोले दोस्रो मिनेटमै गोल गरेर अग्रता दिलाएका थिए । पहिलो हाफमा त्यही १ गोलका कारण पछि परेको जिरोनाले ४९ औं मिनेटमा बराबरी गरेको थियो भने जिरोनाका लागि त्स्यगानकोवले बराबरी गोल फर्काएका थिए, तर ५६औं मिनेटमा एलेजान्ड्रोले व्यक्तिगत दोस्रो गोल गर्दा एथ्लेटिक बिलबाओ २-१ ले अघि बढेको थियो ।

त्यसैगरी ६० औं मिनेटमा इनाकी विलियम्सले गोल गर्दै एथ्लेटिकलाई ३-१ ले अघि बढाएका थिए भने ७५औं मिनेटमा एरिक ग्रासियाले गोल गरेर जिरोनालाई राहत दिलाए पनि अन्ततः एथ्लेटिक विलबाओ ३-२ ले विजयी भयो । सो जितसँगै बिलबाओ तालिकामा ४९ अंकका साथ पाँचौं स्थानमा छ भने पराजित भएको जिरोना ५६ अंकका साथ दोस्रो स्थानमा यथावत रहेको छ ।

ला लिगामा रियल मड्रिड ६२ अंकका साथ शीर्ष स्थानमा रहेको छ ।