अमेरिकामा रेलमा ग्याङ फाइट हुँदा चल्यो गोली, एक जनाको मृत्यु

अमेरिका। अमेरिकाको न्यूयोर्कमा सबवे रेलमा किशोरहरूको दुई समूहबीच झडप भएपछि ग्याङ फाइटको क्रममा एक किशोरले गोली चलाउँदा एक जनाको मृत्यु भएको छ। समाचार संस्था रोयटर्सका अनुसार पहिलो गोली रेलभित्रै चलेको थियो। उक्त गोली रेलको डिब्बामा लागेको थियो।

सोमबार न्यूयोर्कको ब्रन्क्समा सबवे रेलभित्रै किशोरहरूको दुई समूहबीच झडप भएपछि एक किशोरले गोली चलाउँदा एक जनाको मृत्यु भएको र पाँच जना घाइते भएको न्यूयोर्क सिटी प्रहरीले जनाएको छ। प्रहरीका अनुसार माउन्ड एडेन एभेन्यू स्टेशनमा रेल रोकिएपछि बाहिर निस्किएर ती किशोरले अन्धाधुन्ध गोली चलाएका थिए।

मृतक ३४ वर्षीय एक पुरूषलाई स्टेशनमा गोली लागेको थियो। स्टेशनमा रहेका अन्य पाँच जना व्यक्तिलाई गोली लागेपछि तत्काल अस्पताल लगिएको थियो। अहिले उनीहरू खतरामुक्त रहेको न्यूयोर्क सिटी प्रहरीले जनाएको छ।

गोली चलाउने किशोर भने फरार छन्। उनको मोस्ट वान्टेड सूचीमा राखेर प्रहरीले खोजी गरिरहेको न्यूयोर्क सिटी प्रहरीले जनाएको छ।