७ माघ २०८०, आईतवार
वीरगन्ज। आसन्न राष्ट्रिय सभाको निर्वाचनलाई लक्षित गर्दै आज जनकपुर सत्ता गठबन्धनले अभिमुखीकरण कार्यक्रमको आयोजना गरेको छ ।
उक्त राष्ट्रिय सभा निर्वाचन समन्वय समिति (गठबन्धन दल) मधेस प्रदेश जनकपुरले महेन्द्रनारायण निधी मिथिला संस्कृति भवनमा अभिमुखीकरण कार्यक्रमको आयोजना गरेको हो ।
त्यस्तै, माघ ११ गते हुने राष्ट्रिय सभा निर्वाचनमा गठबन्धन दलका साझा उम्मेदवारलाई विजयी बनाउन मधेस प्रदेश सभा सदस्य एवं स्थानीय तहका नगर प्रमुख/उपप्रमुख तथा गाउँपालिका अध्यक्ष र उपाध्यक्षहरूका लागि अभिमुखीकरण कार्यक्रम राखिएको कार्यक्रममा सहभागी प्रदेश सांसद श्याम पटेलले जनाएका छन् ।
उक्त मधेस प्रदेशको जनकपुरमा गठबन्धनद्वारा आयोजित अभिमुखीकरण कार्यक्रममा प्रचारप्रसार समिति संयोजक रमेश लेखक, सदस्यहरू माओवादी नेता वर्षमान पुन, जसपा नेता मनिष सुमनसहितका प्रतिनिधिहरूको उपस्थिति रहेको छ । सत्ता गठबन्धनमा कांग्रेस, माओवादी, नेकपा एस, जसपा, लोसपा, नागरिक उन्मुक्ति पार्टी र राष्ट्रिय जनमोर्चा आबद्ध छन् भने यो सबै दलबाट २ जनाको उम्मेदवारी परेको छ ।
सो अभिमुखीकरण कार्यक्रममा प्रदेशका ८ वटै जिल्लाका गठबन्धनका प्रदेश सांसदहरू,मेयर÷उपमेयर तथा पालिका प्रमुख/उपप्रमुखहरूको सहभागिता रहेको छ भने मधेस प्रदेशमा गठबन्धनबाट राष्ट्रिय सभा सदस्यमा उम्मेदवारद्वय आनन्द ढुंगाना र पूजा चौधरीलाई जिताउनका लागि छलफल तथा अभिमुखीकरण कार्यक्रम राखिएको आयोजक समितिले जनाएको छ ।
त्यस्तै, मधेस प्रदेशमा १ सय ७ जना प्रदेशसभा सदस्य, २६७ जना जनप्रतिनिधि गरी ३७४ मतदाता सहभागी हुनेछन् भने प्रत्येक प्रदेशसभा सदस्यको मतभार ५३ र प्रत्येक स्थानीय तहका प्रमुख तथा उपप्रमुखको मतभार १९ कायम गरिएको छ ।
सो निर्वाचनमा स्थानीय तहको ५ हजार ७३ मतभार र प्रदेशसभा सदस्यको ५ हजार ६७१ मतभार गरी कुल १० हजार ७४४ कुल मतभार छ ।
प्रकाशित मिति: ७ माघ २०८०, आईतवार
