२४ पुष २०८०, मंगलवार
काठमाडौं। रक्षामन्त्री पूर्णबहादुर खड्काले ज्योतिष विद्यालाई हचुवाका भरमा जीविकोपार्जनको माध्यम बनाउने प्रवृत्तिको अन्त्य गर्नुपर्ने बताएका छन् ।
मंगलबार काठमाडौंमा नेपाल ज्योतिष परिषद्को रजत महोत्सव पारेर आयोजित कार्यक्रममा रक्षामन्त्री खड्काले ज्योतिष परिषद्को सफलताको कामना गर्दै ज्योतिष विद्यालाई चीना बनाउने र टिप्पणी गर्नेभन्दा माथि उठाउनुपर्नेमा जोड दिए ।
त्यस्तै, ज्योतिष विद्यालाई व्यवस्थित, वैज्ञानिक र अनुसन्धानमूलक रूपमा विकास गर्न आवश्यक भएको औँल्याउँदै त्यसका लागि सरकारले सहयोग गर्ने आश्वासन खड्काले दिएका छन् ।
उनले समाजमा ज्योतिष विद्याको महत्व उल्लेख्य रहेको बताउँदै हाल ज्योतिष विद्या जान्नेको नाममा गलत सन्देश फैलाउने र कमाईखाने पेशा बनाउने प्रवृत्ति बढेको भन्दै त्यसको अन्त्य गरी अझ वैज्ञानिक र व्यवस्थित गर्न आवश्यक भएको धारणा राखे । त्यसका लागि उनले सम्बद्ध पक्षको ध्यानाकर्षण गराए ।
‘ज्योतिष विद्यालाई यदाकता हचुवाको रूपमा अभ्यास गर्ने र यसलाई जीविकोपार्जनको माध्यम मात्र बनाउने गरेको देखिएको छ । त्यसलाई निराकरण गरी यो विद्यालाई वैज्ञानिक र अनुसन्धानमूलक विद्याको रूपमा विकास गर्न आवश्यक छ भने यसतर्फ यो संस्था र सबै विज्ञहरूले विशेष ध्यानदिनुहुन अनुरोध छ,’ खड्काले भने ।
उनले भने, ‘ज्योतिष हाम्रो समाज,पारिवारिक र व्यक्तिगत जीवनसँग अभिन्न रूपमा गाँसिएको विद्या हो । यो प्रमाणित भैसकेको छ । यसलाई हामीले अब नयाँ प्रविधि र पद्धतिसँग आबद्ध गर्दै विश्वभर यसको प्रचार(प्रसारमा अघि बढ्न अझ बढी जोड गर्नुपर्ने आवश्यकता छ । यो संस्थाले त्यसको लागि पहल गरोस् । आवश्यक सहयोग गर्न सरकार तयार छ ।’ कार्यक्रममा ज्योतिष विद्याको क्षेत्रमा योगदान पुर्याएका व्यक्तिहरूलाई सम्मान गरिएको थियो ।
त्यस्तै, परिषद्ले ज्योतिष विद्याको माध्यमबाट नागरिकमा ज्योतिषिय सन्देश प्रवाह गर्न निकै ठूलो भूमिका निर्वाह गर्दै आएको भन्दै प्रशंसा गरेका खड्काले ज्योतिष विद्यालाई समय प्रविधि सुहाउँदो गरी विकास गर्नुपर्नेमा जोड दिएका छन् ।
प्रकाशित मिति: २४ पुष २०८०, मंगलवार
