२० पुष २०८०, शुक्रबार
गोलबजार। सिरहाका गोलबजार नगरपालिका र औरही गाउँपालिकाले अनुदान कार्यक्रमअन्तर्गत आफ्ना किसानले प्रयोग गरेको कृषि विद्युत् मिटरको महसुल नेपाल विद्युत् प्राधिकरणलाई बुझाएका छन् ।
गोलबजार नगरपालिकाका प्रमुख श्यामकुमार श्रेष्ठले नेपाल विद्युत् प्राधिकरण मिर्चैयाका वितरण केन्द्रका प्रमुख मनोजकुमार शर्मालाई रु सात लाख ९७ हजार छ सय ४५ को चेक हस्तान्तान्तरण गरे । भुक्तानी भएको रकम गत साउनदेखि अहिलेसम्मको भएको उल्लेख गर्दै नगरपालिकाका कृषि शाखाका प्रमुख वीरेन्द्र यादवले आगामी दिनमा नियमित आउने निवेदनमा समेत आवश्यक छानबिन गरी थप्दै जाने जानकारी दिए ।
ृउक्त नगरपालिकामा परेका एक हजार दुई सय ३५ निवेदनमध्ये १७ वटा अन्य मिटर र १२ वटाको आवश्यक कागजात नपुगेकाले भुक्तानी दिन बाँकी भएको उनको भनाइ रहेको थियो । वितरण केन्द्र प्रमुख शर्माले नगरक्षेत्रमा तीन हजारको हाराहारीमा कृषि मिटर रहेको र सानै परिमाणमा भए पनि किसानले प्रत्याक्ष लाभ पाएको उल्लेख गरे ।
त्यसैगरी, सिरहाको औरही गाउँपालिकाले किसानलाई सहुलियतका लागि पालिका क्षेत्रमा चलाइएका कृषि मिटरको महसुल उपलब्ध गराएको छ । गाउँपालिका अध्यक्ष शिवजी यादवले रु १० लाखको चेक प्राधिकरण सिरहा वितरण केन्द्र प्रमुख बासुकीनाथ झालाई हस्तान्तरण गरे ।
उक्त गाउँपालिका क्षेत्रभित्र रहेका पाँच सय नौ किसानले खेतीपातीका लागि कृषिका लागि मिटर जडान गरेका थिए । वडा नं १ र २ को महसुल चाँडै लहान प्राधिकरणलाई बुझाइने गाउँपालिकाले जनाएको छ ।
प्रकाशित मिति: २० पुष २०८०, शुक्रबार
