रुबिना क्षेत्री प्लेयर अफ दि टुर्नामेन्ट घोषित

काठमाडौं। प्रधानमन्त्री कप टी-२० महिला क्रिकेट प्रतियोगितामा रुबिना क्षेत्री प्लेयर अफ दि टुर्नामेन्ट घोषित भएकी छन् ।

आज भएको फाइनलमा सशस्त्र प्रहरी बलले कोशी प्रदेशलाई ११ रनले पराजित गर्दै उपाधि जितेको छ भने कोशीकी कप्तान रुबिना क्षेत्रीले ६२ रन बनाए पनि टोलीको जितका लागि पर्याप्त भएन ।

यद्यपि प्रतियोगिताकै सर्वोत्कृष्ट खेलाडी बन्न सफल भइन् । सो प्रतियोगिताको कुल १० खेलमा ३४४ रन बनाएकी राष्ट्रिय टिमकी पूर्वकप्तान रुबिनाले १० विकेट लिएकी थिइन् भने उनले स्कुटर पुरस्कार पाएकी छन् ।

त्यस्तै, गण्डकी प्रदेशकी ज्योत्स्निका मरासिनी उदीयमान खेलाडी घोषणा भइन् । उनले ७ खेलमा ९१ रन बनाएकी थिइन्, जसमा कर्णालीविरुद्ध ५० रनको इनिङ खेलेकी थिइन् भने उनले ५० हजार बराबरको क्रिकेट सामाग्री प्राप्त गरेकी छन् ।

उक्त प्रतियोगिता उत्कृष्ट बलर पूजा महतो चुनिइन् । पूजाले ७ खेलमा १२ विकेट लिएकी थिइन् । सुमन खतिवडा उत्कृष्ट ब्याटर चुनिइन् भनेउनले ७ खेलमा २ सय १२ रन बनाएकी थिइन् ।

त्यस्तै, सुमन र पूजाले समान ५० हजार प्राप्त गर्नेछन् ।