२९ मंसिर २०८०, शुक्रबार
काठमाडौं। काठमाडौं महानगरपालिकाका मेयर बालेन्द्र साह (बालेन)ले प्रधानमन्त्री पुष्पकमल दाहाल ‘प्रचण्ड’समक्ष तीन माग राखेका छन् । शुक्रबार महानगरको २९औँ महानगर दिवस कार्यक्रममा प्रमुख साहले सङ्घ, प्रदेश र स्थानीय तहसँग मिलेर यी तीन समस्याको समाधान गर्न माग गरेका हुन् ।
महानगर दिवसका अवसरमा बालेनले तीनकुनेको मुआब्जा, खोला अतिक्रमण र दीर्घकालीन रूपमा फोहोर व्यवस्थापन गरिदिन प्रधानमन्त्री ‘प्रचण्ड’समक्ष माग गरेका हुन् । उनले महानगरबाट काम पनि भइरहेको बताएका छन् ।
‘हामीले गरेका काम तपाईँहरूले थाहा पाइसक्नु भएको छ, तर अझै बाँकी काम छन्, महानगरले बाचा गरेको छ । तीमध्ये विशेष तीनकुनेको मुआब्जाको विषय छ । खोला अतिक्रमणको समस्या छ । फोहोर व्यवस्थापनको दीर्घकालीन व्यवस्थापन गर्नुपर्ने काम छ । प्रधानमन्त्रीज्यू यहीँ हुनुहुन्छ । सङ्घ प्रदेश र स्थानीय सरकार मिलेर यो सबै मिलाउन सकोस् भनी कामना गर्छु,’उनले भने।
उक्त महानगर प्रमुख साहले अझै ३ वर्ष कार्यकाल बाँकी रहेको भन्दै उक्त कार्यकालमा बाँकी काम गर्ने दाबी गरेका छन् ।
प्रकाशित मिति: २९ मंसिर २०८०, शुक्रबार
