१५ मंसिर २०८०, शुक्रबार
काठमाडौं। नेपाली राष्ट्रिय पुरुष फुटबल टोलीका पूर्व प्रशिक्षक भीम थापाको ७५ वर्षको उमेरमा बिहीबार राति निधन भएको छ ।
कुलेश्वरस्थित आफ्नै घरमा बेहोस भएका थापालाई तत्कालै मेडिसिटी अस्पताल लगिएकोमा चिकित्सकले मृत घोषणा गरेको अखिल नेपाल फुटबल सङ्घ (एन्फा) ले जनाएको छ । थापाले सन् १९७१ मा जापानमा भएको यू-१९ एसियन च्याम्पियनसिपमा राष्ट्रिय टोलीको प्रतिनिधित्व गरेका थिए। उनले न्युरोड टिम, ठमेल, महावीर क्लबबाट क्लब प्रतियोगितामा पनि खेलेका थिए ।
त्यसैगरी खेलाडी जीवनपछि थापाले प्रशिक्षण सुरु गरेका थिए। रुक्म शमशेर राणाको अध्यक्षतामा उनले एन्फाको सहायक महासचिवको रूपमा काम गरेका थिए भने उनी एन्फाका पूर्व प्राविधिक निर्देशक पनि हुन् ।
एन्फाले एन्फा एकेडेमी प्रस्ताव गरेपछि थापाले विस्तृत कार्ययोजना तयार गरेका थिए ।
प्रकाशित मिति: १५ मंसिर २०८०, शुक्रबार
