कारागारमा दसैँ : ‘जहाँ बस्यो त्यही रमाइलो’

चितवन । बडादसैँ घर–घरमा हर्षोल्लासका साथ आउँदै गर्दा कारागारमा बन्दी जीवन बिताइरहेकाहरू त्यही घर सम्झेर दसैँ मनाउँदै छन् । कैदीबन्दीले जहाँ बस्यो त्यही रमाइलो हुने भन्दै सबै मिलेर दसैँ मनाउने बताएका छन् । कैद जीवन बिताउँदै आएका कैदीबन्दी विगतका वर्षमा जस्तै यस वर्ष पनि दसैँ मनाउने तयारीमा जुटेका छन् । दसैँ सुरु भएसँगै विभिन्न खेलकुद तथा सांस्कृतिक कार्यक्रम गरिरहेका छन् । हेटौँडाकी शर्मिला शर्माले घरगाउँको दसैँको सम्झनासमेत हुन छाडेको बताउदै घरगाउँको जस्तो नभए पनि यहाँ छुट्टै रमाइलो हुने गरेको उनले बताएकी छन् । उनले चाडपर्वमा परिवारसँग बस्न नपाए पनि विगत आठ वर्षदेखि चाडपर्व कारागारमै मनाइरहेको बताएकी छन् । भरतपुर महानगरपालिकाका रमेश विश्वकर्मा चाडपर्वको समयमा परिवारको यादले सताउने गरेको बताउछन् । उनले चाडपर्वको महत्व कारागारले बुझाएको बताउँदै कारागारमा बसेर दसैँ मनाउनु पर्दा निकै दुःख लाग्ने समेत व्यक्त गरेका छन् । विगत चार वर्षदेखि कारागार जीवन बिताइरहेका हरि शर्मा लाई पनि चाडपर्वमा परिवारका सदस्य आएर टीका लगाइदिँदा निकै नरमाइलो लाग्ने गरेको र गाउँघरमा बसेर परिवारका साथ दसैँ मनाउन पाउँदा निकै रमाइलो हुने गरेको भन्दै अहिले कारागारमा नै रमाइलो गर्न थालेको उनको भनाइ छ ।

कारागार प्रमुख कमलप्रसाद आचार्यले टीकाको दिन सामूहिक टीका ग्रहण, टीकाअगाडि सामूहिक भोजजस्ता कार्य हुने गरेको बताउदै दसैँमा कडा सुरक्षाका साथ परिवारसँग टीका लगाउन दिने गरी तयारी गरेको, टीकाको दिनदेखि पूर्णिमाको दिनसम्म टीका ग्रहणका लागि समय दिने बताएका छन् । उनका अनुसार कारागार कार्यालय चितवनमा अहिले सात सय २९ कैदीबन्दी छन् । जसमध्ये ४४ महिला र पाँचजना बालबालिका छन् भने बाँकी पुरुष छन् । पाँच सय पाँच जनाको क्षमता रहेको उक्त कारागारमा क्षमताभन्दा बढी कैदीबन्दी रहेका आचार्यले बताए ।