३ कार्तिक २०८०, शुक्रबार
काठमाडौं । द्वन्द्वग्रस्त देश इजरायल भ्रमणबाट फर्किएका अमेरिकी राष्ट्रपति जो बाइडेनले ह्वाइट हाउसबाट देशवासीलाई सम्बोधन गरेका छन् । सम्बोधनका क्रममा उनले हमास र रुसी राष्ट्रपति भ्लादिमिर पुटिनलाई जोडेका छन् । उनले हमास र पुटिन दुबैबाट अलग–अलग खतरा छ, तर दुबैमा एउटा समानता छ । दुबै छिमेकमा लोकतन्त्रलाई समाप्त पार्न चाहन्छन् भनेका छन् ।इजरायल भ्रमणका क्रममा बाइडेनले हमासको आक्रमणबाट पीडित मानिसहरुलाई पनि भेटेका थिए । उनले राष्ट्रपतिका रुपमा मेरा लागि बन्धक बनाइएका अमेरिकी नागरिकको सुरक्षाभन्दा ठूलो केही छैन, इजरायल–हमास संघर्षमा दुबैतर्फबाट प्रभावित आम मानिसप्रति समवेदना व्यक्त गरेका छन् । आम मानिसहरुलाई दुबै निकै टाढा लडिरहेकाले यसको के अर्थ हुन्छ र भन्ने लाग्न सक्ने बताउदै अमेरिकाको राष्ट्रिय सुरक्षाका लागि पनि इजरायल र युक्रेन सफल हुन जरुरी रहेको समेत बताए ।
इजरायल र युक्रेनलाई सहयोग नगर्नु उपयुक्त नभएको भन्दै उनले अमेरिकी कांग्रेसलाई उपयुक्त कदम चाल्न र आर्थिक सहायता प्याकेज पास गर्न आग्रह गरेका छन् । सम्बोधनका क्रममा उनले यो यस्तो समय हो, जुन बेला हामीले लिने निर्णयले आगामी दशकको भविश्य तय गर्ने छ भनेका छन् । उनले हालै गाजाको अस्पतालमा भएको आक्रमणबाट आफू निकै दुःखी भएको समेत उनले बताए ।
प्रकाशित मिति: ३ कार्तिक २०८०, शुक्रबार
