१२ भाद्र २०८०, मंगलवार
१२ ,भाद्र ,धनगढी । पत्थरीको समस्याले उपचाररत बिरामीको मृत्युपछि विवादमा तानिएको स्वस्तिक कार्डियो एण्ड अस्पतालले हालसम्म सञ्चालनको अनुमति नलिएको पाइएको हो ।
२५ शय्याको अस्पताल सञ्चालनको लागि प्रदेश सरकार मातहतको स्वास्थ्य निर्देशनालयबाट सञ्चालन अनुमति लिनुपर्ने प्रावधान भए पनि अस्पतालले निर्देशनालयबाट हालसम्म अनुमति नलिएको पाइएको हो ।
सुदूरपश्चिम स्वास्थ्य निर्देशनालय डोटीका निर्देशक डाक्टर जगदीश जोशीका अनुसार सो अस्पतालले २५ शय्याको लागि प्रक्रिया अगाडि बढाएको छ । निर्देशक जोशीले भने, ‘अस्पताल दर्ता प्रक्रियाका लागि फाइल आएको छ । तर केही कागजात अपुग देखिएपछि सञ्चालन अनुमति दिएका छैनौँ ।’
पत्थरीको अपरेशन गर्दा मिर्गाैला निकालिएपछि कञ्चनपुरको बेलौरी नगरपालिका–१०, शिवनगरका ५७ वर्षीय ऐजनलाल चौधरीको मृत्यु भएको हो । उनी शनिबार दिउँसो सो अस्पतालमा भर्ना भएका थिए ।
अस्पतालका डाक्टर जोनस तिवारीले बायाँ किड्नीको पत्थरीको अप्रेसनको क्रममा किड्नी नै झिक्दा अत्याधिक रक्तश्राव भइ बिरामीको मृत्यु भएपछि मृतकका आफन्त भने आन्दोलित भएका छन् ।
डाक्टरको लापरबाहीका कारण बिरामीको ज्यान गएको भन्दै आफन्त डाक्टरलाई कारबाहीको मागसहित उचित क्षतिपूर्तिको माग गर्दै आन्दोलित भएका हुन् ।
प्रकाशित मिति: १२ भाद्र २०८०, मंगलवार
