२७ श्रावण २०८०, शनिबार
२७ श्रावण, एजेन्सी । स्पेन र स्विडेन फिफा महिला विश्वकप फुटबलको सेमिफाइनलमा प्रवेश गरेको छ । विलिंघटनमामा शुक्रबार भएको खेलमा स्पेनले साविक उपविजेता नेदरल्यान्ड्सलाई अतिरिक्त समयमा २–१ गोलले हरायो । अर्को खेलमा स्विडेनले जापानलाई २–१ गोलले नै स्तब्ध बनायो ।
निर्धारित समयको खेल १–१ गोलको बराबरीमा सकिएपछि अतिरिक्त समयमा स्पेनले निर्णायक गोल गरेको थियो । स्पेनको जितमा मारियोना ओलिभर काल्डेन्टे र साल्मा पारालुइलोले गोल गरिन् । नेदरल्यान्डस्का लागि स्टेफनी भान डेर ग्राटले गोल गरिन् ।
प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । मारिओनाले ८१औं मिनेटमा गोल गर्दै स्पेनको उत्साह जगाइन् । ९०औं मिनेटमा स्टेफनीले गोल गर्दै खेललाई बराबरीमा ल्याइन् ।
त्यसपछि अतिरिक्त समयमा धकेलिएको खेलमा एक सय ११औं मिनेटमा साल्माले गोल गर्दै स्पेनको सेमिफाइनल यात्रा पक्का बनाइन् । सन् २०१५ बाट महिला विश्वकप खेल्न थालेको स्पेन पहिलो पटक फिफा महिला विश्वकपको सेमिफाइनलमा पुगेको हो ।
यसैगरी न्युजिल्यान्डको अकल्यान्डस्थित इडेन पार्कमा भएको अर्को सेमिफाइनलमा स्विडेनलाई जिताउन अमान्डा इलेस्टेडेटले ३२औं र फिलिपा एन्जलडेटले ५१औं मिनेटमा गोल गरिन् । जापानका लागि होनोका हायाशीले ८७औं मिनेटमा सान्त्वना गोल फर्काइन् ।
स्विडेन पाँचौ पटक फिफा महिला विश्वकपको सेमिफाइनलमा पुगेको हो । सन् २००३ को उपविजेता स्विडेन सन् १९९१, २०११ र २०१९ मा तेस्रो भएको थियो । सेमिफाइनलमा स्डिेन र स्पेनबीच प्रतिस्पर्धा हुनेछ ।
प्रकाशित मिति: २७ श्रावण २०८०, शनिबार
