२२ श्रावण २०८०, सोमबार
२२ श्रावण, एजेन्सी । भारतको उत्तराखण्डको गौरीकुण्डमा गएको पहिरोमा परी बेपत्ता भएका हुम्लाका तीन जनाको पहिचान खुलेको छ । उहाँहरू पहिरोमा परी बेपत्ता भएको पाँच दिनपछि प्रहरी गाउँमा पुगेर आफन्तसँग बुझ्दा पहिचान खुलेको हो ।
जिल्ला प्रहरी कार्यालयका प्रहरी निरीक्षक दीपक मल्लले केदारनाथ पहिरोमा परी बालसम्म बेपत्ता भएका तीन जना हुम्लावासी रहेको बताए । उनका अनुसार तीनै जना खार्पुनाथ गाउँपालिका वडा–३ को राया गाउँवासी रहेका छन् ।
पहिरोमा परी बेपत्ता भएका व्यक्तिमा राया गाउँका ६५ वर्षका वीरबहादुर रावल, उनकी श्रीमती ५५ वर्षकी सुमित्रा रावल र २५ वर्षकी छोरी निशा रावल रहेको प्रहरी निरीक्षक मल्लले जानकारी दिए । यसअघि भारतीय सञ्चारमाध्यममा ठेगाना स्पष्ट भएका तर नाम पूरा नभएकाको विवरण सार्वजनिक भएपछि प्रहरी गाउँमै पुगेर यथार्थ विवरण ल्याउने काम गरेको हो ।
बेपत्ताका स्थानीय देवी रावलले २२ वर्ष अगाडि उनिहरू गाउँ छाडेर भारत गएको बताउँदै उनि होटेल व्यवसाय गरिरहेको बताए । यसअघि सो पहिरोमा एकै घरका सातजनासहित गौरीकुण्डमा गएको पहिरोमा परी बेपत्ता भएका जुम्ला पातारासीका ११ जनाको परिचय खुलेको थियो । हालसम्म पहिरोमा परी पातारासी गाउँपालिका –२ र ३ कै तीन जना मृतकको सनाखत भइसकेको छ ।
प्रकाशित मिति: २२ श्रावण २०८०, सोमबार
