२० श्रावण २०८०, शनिबार
२० श्रावण, एजेन्सी । स्पेन र जापान फिफा महिला विश्वकप फुटबलको क्वार्टरफाइनलमा प्रवेश गरेका छन् । न्युजिल्यान्डको अकल्यान्डमा शनिबार भएको खेलमा स्पेनले स्वीट्जरल्यान्डलाई ५–१ गोलले हरायो । अर्को खेलमा जापानले नर्वेलाई ३–१ गोलले हराउँदै अन्तिम आठमा स्थान सुरक्षित गरेको हो ।
एकपक्षीय खेलमा स्पेनको जितमा एइटाना बोनमटी कोन्काले पाँचौँ र ३६औँ मिनेटमा गोल गरिन् । अल्बा रेडोन्डो फेरेरले १७औँ, लाइया कोडिना पानेडासले ४५औँ र जेनिफर हेर्मोसो फुइनटेसले ७०औँ मिनेटमा गोल गरिन् ।
स्वीट्जरल्यान्डले स्पेनकी लाइया कोडिना पानेडासबाट आत्मघाती गोल उपहार पाएको थियो । क्वार्टरफाइनलमा स्पेनले नेदरल्यान्ड्स र दक्षिण अफ्रिकाबीचको विजेतासँग प्रतिस्पर्धा गर्नेछ ।
यस्तै जापानको जितमा रिसा सिमिजुले ५०औँ र हिनाता मियाजावाले ८१औँ मिनेटमा गोल गरिन् । जापानले सुरुवाती गोल १५औँ मिनेटमा नर्वेकी इनग्रिड सेयसटाड इंगेनबाट आत्मघाती उपहार पाएको थियो ।
नर्वेकी गुरो रेइटेनले २०औँ मिनेटमा गरेको गोल सान्त्वना बन्यो । जापानले क्वार्टरफाइनलमा स्विडेन र अमेरिकाबीचको विजेतासँग प्रतिस्पर्धा गर्नेछ ।
प्रकाशित मिति: २० श्रावण २०८०, शनिबार
