९ श्रावण २०८०, मंगलवार
९ श्रावण, काभ्रेपलाञ्चोक । काभ्रेपलाञ्चोकको सदरमुकाम धुलिखेलस्थित धुलिखेल अस्पताल र बनेपा नगरमा रहेको शिर मेमोरियल अस्पतालमा सामाजिक सुरक्षा कोषमा आबद्ध भएका नागरिकको उपचार सेवा शुरू गरिएको छ ।
२ अस्पताल र सामाजिक सुरक्षा कोषबीच गत जेठमा छुट्टाछुट्टै द्विपक्षीय सम्झौता भई सामाजिक सुरक्षा कोषमा सूचीकृत भएका नागरिकको उपचार सेवा शुरू गर्ने सहमति भएको थियो ।
सम्झौताअनुसार हाल दुवै अस्पतालले सेवा शुरू गरेको जनाएका हुन् । धुलिखेल अस्पतालले भने स्वास्थ्य बीमा गरेका नागरिकको उपचार गर्दै आएको छ ।
धुलिखेल अस्पतालका प्रशासन प्रमुख प्रद्युम्न श्रेष्ठका अनुसार सामाजिक सुरक्षा कोषमा सूचीकृत नागरिक बिरामी भएको अवस्थामा अस्पतालले कोषका तर्फबाट ८० प्रतिशत प्राप्त गर्छ भने व्यक्तिले २० प्रतिशत तिर्नु पर्नेछ । उनले नागरिकलाई थप सहजताका लागि कोष उपयोगी देखिएकाले सेवा शुरू गरिएको बताए ।
सम्झौताअनुसार सूचीकृत भएको व्यक्ति बिरामी हुँदा कोषबाट उपचार खर्चबापत वर्षमा बढीमा १ लाख रुपैयाँसम्म पाउने छ । उपचार बापतको रकम दाबी गर्न कोषमा न्यूनतम ३ महिना योगदान गरेको हुनुपर्ने जनाइएको छ । कोषमा योगदान गरिरहेका श्रमिकले नजिकैको जुनसुकै अस्पतालमा उपचार गराउन सक्ने व्यवस्था गरिएको छ ।
अस्पतालको प्रेस्क्रिप्सन, औषधि तथा उपचार खर्चका सक्कल बिल, सामाजिक सुरक्षा कोषबाट प्राप्त कार्डसहित कोषमा उपलब्ध गराएपछि अस्पतालले वा सोझै अस्पतालको बिलसहित पेश गरेपछि आवेदन दिन सकिने व्यवस्था गरिएको छ ।
कोषले उपचार बापतको कूल दाबी रकमको ८० प्रतिशत अस्पताल वा व्यक्तिको बैंक खातामा १ हप्तादेखि १५ दिनभित्र जम्मा गरिदिन्छ । यस्तै कोषमा सूचीकृतले औषधोपचार तथा स्वास्थ्य सुरक्षा दाबीसँगै मातृत्व सुरक्षा, दुर्घटना तथा अशक्तता, आश्रित परिवार तथा उपदानका लागि दाबी गर्न पाइने व्यवस्था छ ।
धुलिखेल र बनेपामा यो सेवा शुरू भएसँगै रकम नभएका नागरिकलाई पनि उपचारमा सहज हुने अपेक्षा गरिएको छ ।
प्रकाशित मिति: ९ श्रावण २०८०, मंगलवार
