१८ असार २०८०, सोमबार
१८ असार, ताप्लेजुङ । असार २ गते राती आएको बाढीले पुल बगाए पछि आवागमन ठप्प भएको मेची राजमार्ग अन्तरगत हेवा खोलामा आइतबार रातीदेखि यातायात र ढुवानीका साधन सुचारु भएका छन् ।
खोलामा ह्युमपाइप र पेन स्टक पाइप राखेर डाइभर्सन गर्दै यातायात र सवारी साधन सुचारु गराइएको हो । हिलिहाङ ७ र फिदिम ४ जोड्ने हेवा खोलामा यसअघि असार १२ र १३ गते २ पटक डाइभर्सन गरेर सवारी पास गराइए पनि पुनः बाढी आएपछि आवागमन ठप्प भएको थियो ।
पुल बगाएपछि हेवा खोला पारी पर्ने पाँचथरका फालेलुङ, हिलिहाङ र याङवरक सँगै सिङ्गो ताप्लेजुङ जिल्ला सडक सम्पर्क विच्छेद भएका छन् । पुल बगेको स्थानमा सडक डिभिजन इलामले बेलिब्रिज निर्माण सुरु गरे पनि प्रगति सुस्त छ । पुल बन्न अझै एक साता लाग्ने भएकाले वैकल्पिक मार्गका रूपमा डाइभर्सन गरिएको जिल्ला प्रहरी कार्यालय पाँचथरका प्रमुख हरि खतिवडाले बताए ।
प्रकाशित मिति: १८ असार २०८०, सोमबार
