२ जेष्ठ २०८०, मंगलवार
२ जेठ, काठमाडाैँ । कमेडी च्याम्पियनको सिजन २ का विजेता भरतमणि पौडेलले तोकिएको पुरस्कारको आधा मात्रै पाएको बताएका छन् ।
हिमालय टेलिभिजनको ‘सेलेब्स टक सो’ सँगको कुराकानीमा उनले विजेता बनेको एक वर्ष पुग्न लाग्दासम्म २५ लाख पुरस्कार तोकिएपनि जम्मा १४ लाख मात्रै पाएको बताएका हुन् ।
पुरस्कार राशिमा आकस्मिक लाभांश करका साथै विभिन्न कर काटिएपछि उनको हातमा त्यति रकम परेको बताइएको छ ।
उनले यसबारे भने, ‘‘यति थोरै रकम आउँछ भने मलाई थाहा थिएन । अलि– अलि त काटिएला भन्ने सोचेको थिएँ तर झन्डै आधा नै काटिँदा अचम्ममा परेँ । के– के कुरा काटियो भनेर पछि सोध्दा करको सूची नै देखाउनुभयो । केही भन्न पनि मिलेन ।’
कमेडी च्याम्पियनका विजेताले पुरस्कार स्वरूप कार पनि पाउँछन् । सो कारका लागि लाग्ने कर पनि सोही पुरस्कार राशीबाट काटिएको उनले बताएका छन् । तर, कार आफ्नो नाममा पास नगरिदिएको भन्दै दुखेसो व्यक्त गरेका छन् ।
उनले प्रतियोगिता सञ्चालन गर्दा यति धेरै रकम नभनेर बरू सुरूमै कम रकम घोषणा गर्दा राम्रो हुने सुझाव दिँदै भनेका छन्, ‘थोरै भए पनि यति पाइन्छ भनेर पहिले नै भनिदिएको भए हुन्थ्यो होला । त्यसमा नै खुसी भइन्थ्यो ।’
प्रकाशित मिति: २ जेष्ठ २०८०, मंगलवार
