२३ बैशाख २०८०, शनिबार
२३ वैशाख, काठमाडाैँ । नेकपा एमालेका अध्यक्ष केपी शर्मा ओलीले सचिव टोपबहादुर रायमाझी आफ्नो सम्पर्कमा नरहेको बताएका छन् ।
शनिबार प्रधानमन्त्री पुष्पकमल दाहाल प्रचण्डसँग भेटवार्ता सकिएपछि बाहिरिँदै गर्दा रायमाझी आफ्नो सम्पर्कमा नभएको बताएका हुन् ।
एक पत्रकारले ओलीलाई ‘पूर्वमन्त्री, उपप्रधानमन्त्री भइसकेको मान्छे त्यसरी हराउँछन् र भन्नुभएको थियो। अहिले त हराइराखेका छन्। कहाँ बस्नुभएको छ उहाँ?,’ भन्दै प्रश्न गरेका थिए ।
त्यसमा ओलीको उत्तर थियो, ‘तपाईंहरूले खोज्नुस् न। मेरो सम्पर्कमा हुनुहुन्न।’
उनले आफु अभियुक्तलाई बचाउन लागेको आरोप हल्ला मात्रै भएको पनि बताए । उनले भने, ‘तपाईंहरूलाई विश्वास लाग्यो त्यस्तो कुरा? केही यस्ता खालका मान्छेहरू छन्, बेइमानीमा भरपर्ने, त्यस्ताहरूले हल्ला चलाउँछन्।’
भुटानी शरणार्थी ठगी प्रकरणमा पक्राउ पुर्जी जारी भएका एमाले सचिव रायमाझी फरार रहेका छन् । अर्घाखाँचीबाट काठमाडाैँ जाने भन्दै हिँडेका उनी बाटोबाटै बेपत्ता भएका थिए ।
प्रकाशित मिति: २३ बैशाख २०८०, शनिबार
