२७ भाद्र २०८३, शनिबार
एजेन्सी। सउलस्थित केन्द्रिय जिल्ला अदालतले दक्षिण कोरियाका पूर्वराष्ट्रपति युन सुक–योललाई आफ्ना पूर्व रक्षामन्त्रीलाई आपराधिक अनुसन्धानबाट जोगाउन राष्ट्रपतीय अधिकारको दुरुपयोग गरेको भन्दै लगाइएको गम्भीर अभियोगबाट शुक्रवार सफाइ दिएको छ ।
अदालतले एक नौसैनिक (मरिन) को मृत्युसम्बन्धी अनुसन्धान प्रभावित पार्ने स्पष्ट मनसाय पुष्टि हुन नसकेको ठहर गर्दै पूर्वराष्ट्रपति युनलाई सफाइ दिएको समाचार संस्था योन्हापले जनाएको छ । उक्त नौसैनिकको मृत्यु प्रकरणको छानबिन गरिरहेको स्वतन्त्र परामर्शदाता ली म्योङ–ह्योनको टोलीले आपराधिक संदिग्धलाई विदेश भगाउन सघाएको र राष्ट्रपतीय पदको दुरुपयोग गरेको ठहर गर्दै युनविरुद्ध पाँच वर्षको जेल सजाय माग गरेको थियो । सन् २०२३ नोभेम्बरमा नौसैनिकको मृत्यु भएको चार महिनापछि मुख्य संदिग्ध मानिएका तत्कालीन रक्षामन्त्री ली जोङ–सुपलाई कारबाहीबाट जोगाउने उद्देश्यले युनले जबर्जस्ती अस्ट्रेलियाका लागि राजदूत नियुक्त गरेको आरोप अभियोजन पक्षले लगाएको थियो । अदालतले रक्षामन्त्री लीमाथि लगाइएको यात्रा प्रतिवन्ध फुकुवा गर्न र राजदूत नियुक्ति प्रक्रियालाई तीव्र पार्न संलग्न रहेका अन्य पूर्व उच्च अधिकारीहरूलाई समेत एकमुष्ट सफाइ दिएको छ ।
यसअघि सन् २०२४ डिसेम्बर ३ मा संकटकालीन सैन्य कानुन (मार्शल ल) घोषणा गरी राज्यविरुद्ध विद्रोह गरेको अभियोगमा युनलाई गत फेब्रुअरीमा आजीवन कारावासको सजाय सुनाइएको थियो । साथै उत्तर कोरियामा ड्रोन घुसपैठ गराएको देशद्रोहसम्बन्धी अर्को मुद्दामा उनले गत जुनमा ३० वर्षको जेल सजाय पाइसकेका छन् । पदमा बहाल रहँदा नै देशद्रोहको मुख्य योजनाकारका रूपमा पक्राउ परी निलम्बन र अभियोग सामना गर्ने युन दक्षिण कोरियाको इतिहासमै पहिलो राष्ट्रपति हुन् ।
प्रकाशित मिति: २७ भाद्र २०८३, शनिबार
