३१ असार २०८३, बुधबार
काठमाडौँ। राष्ट्रिय सभामा नेकपा (एमाले) की सचेतक रोशनी मेचेले प्रशासनिक बोझ संघीय सरकारमै रहेकाले प्रदेशलाई मात्र बलिउडको बोको बनाउन नहुने बताएका छन् ।
बुधवारको राष्ट्रिय सभा बैठकमा बोल्दै उनले सरकारको कार्यशैली, देशको वर्तमान वित्तीय अवस्था र सुशासनको खस्कँदो अवस्थाप्रति ध्यानाकर्षण गराउदै संघीय सरकारको कमजोर वित्तीय अनुशासन र बोझिलो संरचनालाई लुकाउन प्रदेश संरचनामाथि प्रश्न उठाउनु तथ्यहीन रहेको दाबी गरेकी छिन् । सचेतक मेचेले पछिल्लो समय प्रदेश संरचना महँगो भएको भन्दै यसलाई खारेज गर्ने तर्क सस्तो लोकप्रियतावादका लागि फैलाइएको टिप्पणी गरिन् । विगत ३५ वर्षमा देशमा केही उपलब्धि नभएको भन्ने नकारात्मक भाष्यको खण्डन गर्दै मेचेले २०४६ सालयता साक्षरता दर ३९ प्रतिशतबाट बढेर ७६.२ प्रतिशत पुगेको र नेपालीको औसत आयु ५४ वर्षबाट ७१ वर्ष पुगेको तथ्य पेस गरिन् । मातृ मृत्युदर र बाल मृत्युदर न्युनिकरणमा नेपालले हासिल गरेको प्रगति विश्वमै उदाहरणीय रहेको उनले बताइन् ।
उनले भनिन्, ‘सातै प्रदेशका पदाधिकारीको पारिश्रमिक र भत्तासहितको प्रशासनिक खर्च जम्मा ५ अर्ब ४५ करोड रुपैयाँ मात्र छ । तर संघीय सरकारको एउटै मन्त्रालयको बजेट त्योभन्दा बढी देखिन्छ । वित्तीय संकटको मुख्य स्रोत प्रादेशिक संरचना नभई संघीय सरकारकै बोझिलो संरचना र फितलो अनुशासन हो । विदेशका गल्लीमा स्टिकर टाँसेर युवा फर्काउने बाचा गर्नेहरू आज सत्तामा छन्, तर स्वदेशमा रहेका युवाको रोजगारी खोसिँदै छ ।’
वर्तमान सरकारको असफलताका कारण ती ऐतिहासिक उपलब्धिहरू ओझेलमा परेको र युवाहरूमा चरम निराशा छाएको उनको तर्क छ । रोजगारीको अभावमा युवाहरू आत्मदाह गर्न बाध्य हुनुलाई उनले सरकारको चरम असफलताको रूपमा चित्रण गरिन् । सचेतक मेचेले स्वास्थ्य बीमा कार्यक्रम बन्द गरिएकोमा सरकारको आलोचना गरेकी छिन् ।
प्रकाशित मिति: ३१ असार २०८३, बुधबार
