१५ फाल्गुन २०८२, शुक्रबार
काठमाडौँ । राष्ट्रिय स्वतन्त्र पार्टीका वरिष्ठ नेता बालेन शाहले २५ औँ राष्ट्रिय मगर दिवसको अवसरमा मगर समुदायको ऐतिहासिक योगदानको उच्च मूल्याङ्कन गरेका छन्।
सामाजिक सञ्जालमार्फत शुभकामना सन्देश व्यक्त गर्दै उनले मगर समुदायले आफ्नो जातीय पहिचान जोगाउँदै राष्ट्रिय एकता, सामाजिक न्याय र परिवर्तनका आन्दोलनहरूमा उल्लेखनीय भूमिका निर्वाह गर्दै आएको उल्लेख गरेका छन्। मगर समुदायले इतिहासदेखि वर्तमानसम्म नेपालको राजनीतिक, सामाजिक तथा सांस्कृतिक रूपान्तरणमा महत्वपूर्ण योगदान पुर्याएको उनको भनाइ छ।
बालेनले मगर समुदायको मौलिक संस्कृति, भाषा, परम्परा, कला, भेषभूषा र सामूहिक पहिचान नेपाली समाजका अमूल्य सम्पत्ति भएको उल्लेख गर्दै यसको संरक्षण र सम्मान सबैको साझा दायित्व भएको बताए।
राष्ट्रिय मगर दिवसको अवसरमा उनले सम्पूर्ण मगर समुदायमा सुख, शान्ति र समृद्धिको कामना गर्दै एकता र पहिचानको भावना अझ सुदृढ बनोस् भन्ने शुभेच्छा व्यक्त गरेका छन्।
प्रकाशित मिति: १५ फाल्गुन २०८२, शुक्रबार
