बीमा कम्पनीलाई विदेशमा सेवा विस्तार गर्न दिनुपर्छः अध्यक्ष ढकाल

काठमाडौँ । नेपाल उद्योग वाणिज्य महासंघका अध्यक्ष चन्द्रप्रसाद ढकालले बीमा कम्पनीहरुलाई विदेशमा समेत सेवा विस्तार गर्न दिन माग गर्नुभएको छ ।

आईजीआई प्रुडेन्सियल इन्स्योरेन्स कम्पनीको बिहीवार नवनिर्मित भवन उद्घाटन कार्यक्रममा उहाँले नीतिगत सुधार गरी विदेशमा व्यवसाय विस्तार गर्ने वातावरण बनाउन माग गर्नुभएको हो । उहाँले बीमा कम्पनीलाई अन्तर्राष्ट्रिय बजारमा प्रतिष्पर्धा गर्नसक्ने वातावरण बनाउन पनि बीमा प्राधिकरणसँग आग्रह गर्नुभयो । उहाँले नेपालका नियामक निकायहरू नेपाल राष्ट्र बैंक, नेपाल बीमा प्राधिकरण र नेपाल धितोपत्र बोर्डहरु परम्परागत नीतिका कारण अझै सञ्चालन भइरहेको उल्लेख गर्नुभयो । पुराना नीतिकै कारण बैंक तथा वित्तीय क्षेत्रले आफ्नो व्यवसाय अपेक्षित रूपमा विस्तार गर्न नसकेको उहाँको भनाइ छ । अध्यक्ष ढकालले वित्तीय रूपमा सक्षम हुँदाहुँदै पनि पुराना नीतिका कारण व्यवसायिक गतिविधि विस्तारमा अवरोध आएको बताउनु भयो । उहाँकाअनुसार बीमा कम्पनी तथा समग्र बैंक तथा वित्तीय संस्थालाई नियमन गर्ने दृष्टिकोणमा परिवर्तन आवश्यक छ । व्यवसायिक संस्थालाई नाफामुखी र गलत मनसाय राख्ने दृष्टिले मात्र हेर्ने प्रवृत्ति अन्त्य हुनुपर्नेमा उहाँले जोड दिनुभयो । कुनै एक व्यक्तिको गलत कार्यलाई आधार बनाएर सम्पूर्ण संस्थालाई दोषी ठहर गर्ने प्रवृत्ति गलत भएको उहाँको तर्क छ ।

उहाँले भन्नुभयो, ‘कतिपय हाम्रा नियमक निकायहरु नेपाल राष्ट्र बैंक, बीमा प्राधिकरण, नेपाल धितोपत्र बोर्डले परम्परागत हिसावले बनाईएको नितिका कारण चलिरहेका छन् । सोही कारण बैंक तथा वित्तीय क्षेत्रले जुन हिसावले आफ्नो व्यवसाय बढाउन सक्ने हो त्यो अनुसार भएको छैन । फाईनान्सियल रुपमा क्षमतावान हुँदाहुँदै पनि कतिपय पुराना नीतिका कारण जति व्यवसायिक गतिविधि बढाउन सकिन्थ्यो त्योअनुसार नसकेको अवस्था छ । हामी क्षमताको हिसावले सक्षम छौँ भने नेपालमा मात्रै यसको दायर बनाउनपर्छ भन्ने छैन । अन्तर्राष्ट्रिय स्तरमा पनि विस्तार गर्न दिनुपर्छ र त्यसको नियमन राम्रो गर्नुपर्छ । यसले नेपालको अर्थतन्त्रमा नै योगदान हुने भएकोले सोहीअनुसार कानून बनाउनुपर्छ । बीमा कम्पनीहरुलाई नियामक निकायले हेर्ने एउटै दृष्टिकोण छ, त्यस्तो हुनु हुँदैन । चाहे बीमा प्रवद्र्धकका सञ्चालन अवथा बैंक तथा वित्तीय संस्थाका सञ्चालन भनौँ, यिनीहरु सबैले नाफा मात्रै खान खोज्छन्, यिनीहरुमा गलत मनशाय छ भन्ने देखिन्छ, त्यो कदापी होइन । कुनै एक जना व्यक्तिले बद्मासी ग¥यो भने त्यो एक व्यक्तिले गरेको व्यक्तिगत बद्मासीलाई सही हिसावले बढाउन लागेको व्यवसायिक संस्था वा उनीहरुले बढाउन लागेको गतिविधि छ, त्यसमा पनि लगेर जोडिदिने चलन छ । त्यो गलत छ । नेपालभन्दा बाहिर व्यवसायिक गतिविधि बढाउनको लागि पनि नीतिहरु परिवर्तन गरेर बीमा कम्पनीहरुलाई विदेशमा गतिविधि बढाउने वातावरण तयार पार्न आवश्यक छ । यसमा बीमा प्राधिकरण काम गर्नेछ भन्ने विश्वास पनि लिएको छु । आर्थिक गतिविधि बढाउन सकियो भने त्यसले रोजगारी सिर्जना गर्न, राजश्वमा वृद्धि गर्न ठूलो योगदान हुन्छ ।’

अध्यक्ष ढकालले आर्थिक गतिविधिको विस्तारले रोजगारी सिर्जना र राजस्व वृद्धिमा महत्वपूर्ण योगदान गर्ने बताउनु भयो । उहाँले आर्थिक गतिविधिलाई चलायमान बनाउनको लागि कानून तथा नीतिमा सुधार गर्न आवश्यक रहेको दोहो¥याउनु भयो । आईजीआई प्रुडेन्सियल इन्स्योरेन्स कम्पनीले बिहीवार आफ्नै नवनिर्मित भवनको उद्घाटन गरी सेवा सुभारम्भ गरेको छ ।