१२ फाल्गुन २०८२, मंगलवार
काठमाडौँ । नेकपा एमालेले आगामी फागुन २१ गते हुने प्रतिनिधि सभाको निर्वाचन कुनैपनि बहानामा सार्न नहुने स्पष्ट पारेको छ ।
एमालेका केन्द्रिय प्रचार विभाग प्रमुख मीनबहादुर शाहीले मंगलवार आयोजित नियमित पत्रकार भेटघाट कार्यक्रममा बोल्दै निर्वाचन सार्ने गरी भइरहेका विभिन्न भ्रामक हल्ला र षडयन्त्रप्रति पार्टीको गम्भीर ध्यानाकर्षण भएको बताउनुभएको हो । निर्वाचनको मिति आउन अब ९ दिन मात्र बाँकी रहँदा मुलुक निर्वाचनमय भइसकेको अवस्थामा निर्वाचन सार्ने कुरा एमालेका लागि स्वीकार्य नहुने उहाँले चेतावनी दिनुभयो ।
निर्वाचन सुरक्षा र निषेधाज्ञाको विरोध
प्रचार विभाग प्रमुख शाहीले तराई–मधेसका विभिन्न जिल्लाहरूमा जारी निषेधाज्ञा र कफ्र्यूले मतदाताको संवैधानिक अधिकार कुण्ठित गर्नसक्ने भन्दै चिन्ता व्यक्त गर्नुभयो ।
‘शान्ति सुरक्षाका नाममा कफ्र्यू लगाउनु सुरक्षा व्यवस्थापनको कमजोरी हो ।’ शाहीले भन्नुभयो, ‘यसले जनतामा सुरक्षाको अनुभूति भन्दा पनि डर र त्रास पैदा गर्छ, जसका कारण स्वतन्त्र रूपमा मतदान गर्ने अधिकार प्रभावित हुन सक्छ ।’
उहाँले सरकारलाई तत्काल भयरहित वातावरणमा निर्वाचन सम्पन्न गर्ने प्रत्याभूति गराउन माग गर्नुभयो ।
एमालेको बढ्दो लोकप्रियता र ‘भोट फर नेशन’ को नारा
नेकपा एमाले यतिबेला नेपाली जनताको भरोसाको केन्द्र बनेको दाबी गर्दै शाहीले एमालेको बढ्दो लोकप्रियताले अन्य शक्तिहरू अत्तालिएको बताउनु भयो ।
उहाँले भन्नुभयो, ‘अहिले देशभर एमालेको पक्षमा जनलहर छ । हामी ‘भोट फर चेन्ज’ होइन, ‘भोट फर नेशन’ भन्ने उच्च मनोबलका साथ जनताको घरदैलोमा पुगेका छौं ।’
एमालेले स्थायित्व, समृद्धि र सुशासनको स्पष्ट कार्ययोजनासहित अघि बढेको र आगामी निर्वाचनमा १३८ सिटसहित स्पष्ट बहुमत ल्याएर सरकारको नेतृत्व गर्ने उहाँले ठोकुवा गर्नुभयो ।
न्याय प्रणाली र महान्यायाधिवक्ताको भुमिकामाथि प्रश्न
शाहीले महान्यायाधिवक्ताको कार्यालयले विभिन्न आपराधिक क्रियाकलापमा संलग्न व्यक्तिहरूलाई आममाफी दिने तयारी गरेको भन्दै आलोचना गर्नुभयो । जेन–जी प्रदर्शनका क्रममा भएका घटना, सहकारी ठगी र सम्पती शुद्धीकरण जस्ता गम्भीर मुद्दामा लागेकाहरूलाई निर्वाचनको मुखमा सफाइ दिनु ‘न्याय मार्नु’ सरह भएको उहाँको तर्क छ ।
त्यस्तै, प्रतिनिधि सभा विघटनको मुद्दालाई सर्वोच्च अदालतले संवैधानिक परीक्षणमा लैजान आलटाल गरेको भन्दै उहाँले असन्तुष्टि व्यक्त गर्नुभयो ।
‘संवैधानिक सर्वोच्चता स्थापित गर्नका लागि पनि यो मुद्दाको छिनोफानो हुनुपर्छ, ६ महिनासम्म आलटाल गरिनु न्यायसंगत छैन ।’ उहाँले भन्नुभयो ।
मत सर्वेक्षण र सामाजिक सञ्जालको दुरुपयोगप्रति चेतावनी
निर्वाचनको संवेदनशील घडीमा केही सञ्चार माध्यमहरूले प्रायोजित र एकपक्षीय मत सर्वेक्षण सार्वजनिक गरेर मतदाताको मनोविज्ञान प्रभावित पार्न खोजेको एमालेको ठहर छ । शाहीले यस्ता कार्यले पत्रकारिताको विश्वसनीयता गुम्ने र निर्वाचन आचारसंहिताको उल्लंघन हुने बताउनु भयो ।
साथै, आर्टिफिसियल इन्टेलिजेन्स (एआई) को प्रयोग गरी ‘डिप फेक’ भिडियो र भ्रामक अडियोहरू निर्माण गरेर एमाले नेतृत्वको बद्नाम गर्ने प्रयास भइरहेको भन्दै उहाँले नियामक निकायको ध्यानाकर्षण गराउनु भयो ।
‘हाम्रो पार्टी अध्यक्षमाथि अपमानजनक ढंगले सामाजिक सञ्जालमा प्रहार भइरहेको छ, यसलाई तत्काल रोकिनुपर्छ ।’ उहाँले भन्नुभयो ।
आचारसंहिता उल्लंघनमा निर्वाचन आयोगको मौनताप्रति आपत्ति
निर्वाचन आयोगले आचारसंहिता कार्यान्वयनमा प्रभावकारी भुमिका खेल्न नसकेको शाहीको आरोप छ । केही राजनीतिक दलले निर्वाचन चिन्ह अंकित टिसर्ट र अन्य भौतिक सामग्रीहरू वितरण गरिरहँदा पनि आयोग ‘मूकदर्शक’ बनेको उहाँले बताउनु भयो ।
‘धार्मिक परम्परासँग जोडिएको चुनाव चिन्ह प्रयोग गरेर आचारसंहिताको धज्जी उडाइएको छ, आयोगले आजको आजै यस विषयमा एक्सन लिनुपर्छ ।’ उहाँले माग गर्नुभयो ।
धादिङ बस दुर्घटनाप्रति दुःख व्यक्त
प्रचार विभाग प्रमुख शाहीले धादिङको भैंसीगौडामा भएको बस दुर्घटनामा १९ जनाको ज्यान गएको घटनाप्रति दुःख व्यक्त गर्नुभयो । उहाँले मृतकप्रति श्रद्धाञ्जली र घाइतेहरूको शिघ्र स्वास्थ्य लाभको कामना गर्दै पीडित परिवारलाई उचित क्षतिपूर्ति र घाइतेहरूको निःशुल्क उपचारका लागि सरकारसँग माग गर्नुभयो ।
शाहीले एमाले सबै पक्षसँग सहकार्य र विनम्रताका साथ अघि बढ्न तयार रहेको तर निर्वाचनको निष्पक्षता र राष्ट्रिय स्वाभिमानको सवालमा कुनै सम्झौता नगर्ने स्पष्ट पार्नुभयो ।
प्रकाशित मिति: १२ फाल्गुन २०८२, मंगलवार
