३० आश्विन २०८२, बिहीबार
काठमाडौँ। नेकपा (एमाले) का उपाध्यक्ष गुरु बरालले सरकारले अध्यक्ष केपी शर्मा ओली लगायतका नेताहरुलाई सीमाबन्दीमा राखेको उल्लेख गर्दै यही अवस्थामा निर्वाचन सम्भव नरहेको बताएका छन् ।
निर्वाचन आयोगले बिहीवार दलहरुसँग आयोजना गरेको छलफलपछि सञ्चारकर्मीहरुसँग कुराकानी गर्दै उनले शीर्ष राजनीतिक नेतृत्वलाई सीमाबन्दीमा राखेर राहदानी समेत रोकेको कारण निर्वाचनको वातावरणमा बाधा पुगेको बताएका छन् । उनले देशभर सुरक्षा निकायको अवस्था कमजोर रहेको कारण पनि निर्वाचनको लागि भयरहित वातावरण निर्माण हुन नसकेको बताएका छन् । निर्वाचन गराउनको लागि सरकारले लुटिएका हतियार फिर्ता एवं भागेका कैदीहरुदाई समात्न जरुरी रहेको उनको भनाइ छ ।
उनले भने, ‘निर्वाचन गराउनको लागि निश्पक्ष, धाँधलीरहित र भयरहित वातावरण सिर्जना गर्नुपर्ने हुन्छ । वर्तमान सरकारले हाम्रो पार्टीको अध्यक्ष केपी शर्मा ओली लगायत अन्य दलका नेताहरुलाई समेत सीमाबन्दी गरेको छ । अर्थात ठाउँबन्दी गरेको छ । पासपोर्ट रोक्का गरेको छ । त्यो चिजले निर्वाचनको वातावरणमा वाधा पुग्दछ । त्यसैगरी आज सुरक्षा निकाय थलिएको अवस्थामा छ । देशभरी प्रहरीका कार्यालयहरु जलेका छन् । १२ हजारभन्दा बढी आधुनिक हतियार समेत बाहिर रहेको अवस्था छ । भयरहित वातावरणमा निर्वाचन सम्पन्न गर्नको लागि लुटिएका हतियारहरु फिर्ता गर्नुपर्छ । जघन्य अपराधमा संलग्न भएका कैदिहरु समेत अहिले फरार रहेको अवस्था छ । उनीहरुलाई सरकारले नथुनेसम्म भयरहित वातावरण बन्न सक्दैन । निर्वाचन सम्पन्न गराउनको लागि आज स्वयं सरकारले बैठक बोलाउनुपर्ने हो । तर प्रधानमन्त्री स्वयं छलफलका लागि तयार छैन ।’
उनले सरकारले निर्वाचन सम्पन्न गराउनको लागि दलहरुसँग प्रत्यक्ष संवाद गर्न नै नखोजेकोप्रति आपत्ति समेत जनाएका छन् ।
प्रकाशित मिति: ३० आश्विन २०८२, बिहीबार
