२६ आश्विन २०८२, आईतवार
काठमाडौं । लामो समयदेखि विवादमा तानिँदै आएका पूर्वसभामुख कृष्णबहादर महरा पक्राउ परेका छन् ।
२०७९ पुस १० गते फ्लाई दुबई एफजेट०५८७ फ्लाइटमार्फत काठमाडौं आएका चिनियाँ नागरिक लि हानसोङले ल्याएका दुई सुटकेशबाट यो प्रकरण सुरु भएको थियो । सुटकेशभित्रका ७३० भेपमा लुकाइएको सुनको मूल्य करिब ८ करोड ५५ लाख रुपैयाँ बराबर थियो । भन्सारका कर्मचारीहरूको मिलेमतोमा उक्त सुन साटिएको र छुटाउनका लागि महराले प्रभाव प्रयोग गरेको अनुसन्धानले देखाएको छ ।
यसअघि उनका छोरा राहुल महरा र अन्य पाँच जनामाथि मुद्दा दायर भइसकेको छ । अहिले महराको पक्राउसँगै तेस्रो चरणको अभियोजन सुरु भएको हो । अनुसन्धानमा महरा र उनका छोरा राहुलको चिनियाँ तस्करसँग निरन्तर सम्पर्क र कल रेकर्ड पाइएको सीआईबीले जनाएको छ ।
पहिले सत्ता र शक्तिको आडमा अड्किएको यो फाइल अहिले तीव्र गतिमा अघि बढिरहेको छ ।
प्रकाशित मिति: २६ आश्विन २०८२, आईतवार
