२६ आश्विन २०८२, आईतवार
काठमाडौं । शिक्षा, विज्ञान तथा प्रविधिमन्त्री महावीर पुनले वर्तमान परिप्रेक्ष्यमा देशको विकास र सार्वभौम सत्ताको सुरक्षाका लागि “गुटबन्दी र खुट्टा तानातान अन्त्य गर्न” सबै नेपालीलाई अनुरोध गरेका छन्।
उनले सामाजिक सञ्जालमार्फत सन्देश दिँदै इतिहासकै उदाहरणहरू उल्लेख गर्दै भनेका छन्, “गुटबन्दी र खुट्टा तानातानले कहिल्यै देशलाई फाइदा गरेको छैन, बरु बारम्बार ठूलो क्षति पुर्याएको छ।”
महावीर पुनले नेपालको राजनीतिक इतिहासका विभिन्न कालखण्डलाई उद्धृत गर्दै गुटबन्दीकै कारण देशले बारम्बार अस्थिरता र निरंकुश शासन भोग्नुपरेको बताए। र लोकतन्त्रपछिको युगमा राजनीतिक असहमति र भ्रष्टाचारकै कारण जेन-जी आन्दोलनको विस्फोट भयो।
पुनले जेन-जी पुस्तालाई सम्बोधन गर्दै भने, “तपाईंहरूमा ऊर्जा र परिवर्तन गर्ने क्षमता छ, तर अहिले नै गुटबन्दीको प्रवृत्ति देखिँदैछ, त्यो अत्यन्तै खतरनाक संकेत हो।”
उनले थपे, “सुशासन र समृद्धिको सपना पुरा गर्नका लागि जेन-जी र आम नेपालीबीच एकताको भावना आवश्यक छ। गुटबन्दीले कहिल्यै देशको हित गर्दैन।”
अन्त्यमा उनले विनम्र अनुरोध गर्दै भने, “नेपालको इतिहासबाट सिकौं र मातृभूमिको अस्तित्वका लागि फेरि गुटबन्दीको अध्याय नदोहोर्याऔं।”
प्रकाशित मिति: २६ आश्विन २०८२, आईतवार
