२० भाद्र २०८२, शुक्रबार
काठमाडौँ। संघीय मामिला तथा सामान्य प्रशासनमन्त्री भगवती न्यौपानेले संघीयता कार्यान्वयनको चरणमा देखिएका चुनौतीहरू समाधान गर्दै स्थानीय सरकारलाई अझै शक्तिशाली र प्रभावकारी बनाउनुपर्ने बताएकी छिन् ।
शुक्रवार काठमाडौंमा आयोजित ‘गाउँगाउँमा सिंहदरबार’ नामक पुस्तक विमोचन कार्यक्रममा बोल्दै उनले संविधान तथा स्थानीय सरकार सञ्चालन ऐनले दिएको अधिकारको पूर्ण कार्यान्वयन गर्दै स्थानीय तहलाई प्रभावकारी बनाउनुपर्ने बताइन् । उनले अहिलेको अवस्थामा संघीयता पूर्णरुपमा कार्यान्वयन भइनसकेको उल्लेख गर्दै अझै केही समय लाग्ने स्पष्ट पारिन् । उनले संविधान जारी भएपछि भौतिक पूर्वाधार, शिक्षा, स्वास्थ्य र खानेपानीको क्षेत्रमा उल्लेख्य प्रगति भएको दाबी पनि गरे । स्थानीय सरकार जनतामाझ सेवा प्रवाहमा सबैभन्दा नजिकको सरकार भएको उल्लेख गर्दै त्यसलाई बलियो बनाउन संघ र प्रदेशले अधिकार हस्तान्तरण गर्न जरुरी रहेको बताएकी छिन् ।
उनले भनिन्, ‘संविधानले स्थानीय तहलाई धेरै प्रकारको अधिकार दिएको छ । सोहीअनुरुप स्थानीय तहले भौतिक निर्माणका कामहरु गरिरहेको छ । संविधान जारी भएयता स्थानीय तहले शिक्षा, स्वास्थ्य, तथा अन्य विभिन्न कामहरुमा समेत राम्रो प्रगति गरेको छ । आज सबैतिर सडक सञ्जालले छोएको अवस्था छ । स्थानीय तहले सडक विस्तार गर्नेदेखि खानेपानीका समस्याहरु हल गर्ने कुराहरु हुँदै आएको छ । यद्यपि अहिले हामी संघीयता कार्यान्वयनको सवालमा हामी दोस्रो कार्यकालमा छौं । त्यसकारण एकैचोटि सबै समस्याहरुको समाधान हुने स्थिति पनि बन्दैन । संघीयताको अभ्यासका क्रममा देखिएका समस्याहरु समाधान गर्ने सवालमा देखिएका समस्याहरु समाधान गर्दै अझै शक्तिशाली सरकारको रुपमा स्थापित गर्नुपर्ने हुन्छ । जनतालाई सर्भिस डेलिभरीमा सबैभन्दा बढी ध्यान दिने सरकार नै स्थानीय सरकार हो । त्यसैले स्थानीय सरकार शक्तिशाली हुनुपर्छ भनेर नै हामीले लामो समयदेखि आन्दोलन पनि गरेका हौँ । र संविधानले दिन खोजेको अधिकार पनि त्यही हो ।’
सबै तहका सरकारले आफ्नो कार्यक्षेत्र, अधिकार र कर्तव्य पालना गर्नसकेमात्र संविधानको सफल कार्यान्वयन हुनेभन्दै यसतर्फ सबैको ध्यान जान जरुरी रहेको बताइन् ।
प्रकाशित मिति: २० भाद्र २०८२, शुक्रबार
