३० श्रावण २०८२, शुक्रबार
काठमाडौँ। प्रधानमन्त्री केपी शर्मा ओलीले नेपालमा प्रयोगमा रहेका सामाजिक सञ्जालहरु अनिवार्य दर्ता हुनुपर्ने बताएका छन् ।
ललितपुरमा शुक्रवार आयोजित डिजिटल फ्रेमवर्क, २०२५ लाई सम्बोधन गर्दै प्रधानमन्त्री ओलीले नेपालमा सञ्चालन रहेका तर दर्ता हुन नआउने सामाजिक सञ्जालहरुमाथि सरकारले निगरानी बढाइरहेको बताएका छन् । नेपालमा हुने कारोबार नेपालको कानूनअन्तर्गत नै हुनुपर्ने उनको भनाइ छ । मेटा लगायतका सामाजिक सञ्जालहरुलाई नेपालमा दर्ताका लागि आह्वान गरेको सरकारले अहिलेसम्म दर्तामा ल्याउन सकेको छैन । लामो समयदेखि दर्ता हुन बोलाए पनि मेटा लगायतले अटेर गरिरहेका छन् । बिना दर्ता नेपालमा सञ्चालन भइरहेको भन्दै सञ्चार तथा सूचना प्रविधिमन्त्री पृथ्वी सुब्बा गुरुङले सरकारको तर्फबाट बारम्बार दर्ता लागि आह्वान गरिरहेका छन् । नेपाल सरकार नेपाली जनता, नेपाली कानूनप्रति उत्तरदायी हुनुपर्ने भन्दै प्रधानमन्त्री ओलीले नेपालमा गरेको व्यवसायको कर कुनैपनि सामाजिक सञ्जालहरुले तिर्नैपर्ने बताए । नेपालमा प्रयोग हुने कम्पनीहरुले नेपालमा कार्यालय खोल्नुपर्ने र दर्ता हुनुपर्ने बताउदै यदी नेपालको कानूनअन्तर्गत दायित्व र उत्तरदायित्व पूरा नगरेको पाइए ठोस निर्णय गरेर सरकार अघि बढ्ने पनि बताएका छन् ।
प्रधानमन्त्री ओलीले भने, ‘नेपालमा जे कुरा चल्छ, चलाइन्छ, जुन कारोबार नेपालमा हुन्छ, नेपालको कानूनअन्तर्गत हुनुपर्दछ । नेपाल सरकारले थाहा पाएको हुनुपर्दछ । नेपाल सरकार, नेपाली जनता, नेपाली कानूनप्रति उत्तरदायि भएको हुनुपर्दछ । यहाँबाट जुन चल्छ, त्यसको ट्याक्स यहाँ तिर्नुपर्दछ । लाभको ट्याक्स तिर्नुपर्दछ । त्यो भन्दा बाहिर बस्छु भन्ने छुट कसैलाई छैन । नेपालमा प्रयोग हुने त्यस्ता चिजहरुले नेपालमा अफिस खोलेको हुनुपर्दछ । नेपालको कानूनमा रजिस्ट्रड भएको हुनुपर्दछ । नेपालको कानूनअन्तर्गतका दायित्वहरु र उत्तरदायित्वहरु पूरा गरेको हुनुपर्दछ ।’
प्रधानमन्त्री ओलीले इन्टरनेट सेवा सबै ठाउँमा पुर्याउन पनि सञ्चारमन्त्रालयलाई निर्देशन दिएका छन्।
प्रकाशित मिति: ३० श्रावण २०८२, शुक्रबार
