१८ श्रावण २०८२, आईतवार
विराटनगर। नेपाली कांग्रेसका वरिष्ठ नेता डा. शेखर कोइरालाले देशमा लोकतन्त्रको जरो कमजोर हुँदै गएको भन्दै गम्भीर चिन्ता व्यक्त गरेका छन्।
विराटनगरमा आयोजित एक सम्मान समारोहमा सम्बोधन गर्दै उनले ठुला दुई दल मिलेर बनेको सरकारसमेत पारदर्शी, जवाफदेही र उत्तरदायी बन्न नसकेको तीतो यथार्थ प्रकट गरे।
उनका अनुसार कार्यपालिका, व्यवस्थापिका र न्यायपालिका—तीनवटै अंग आफ्नो भूमिकामा असफल हुँदा लोकतन्त्र जोखिममा परेको छ। यस्ता अवस्थामा जनताले सुशासनको अनुभूति कसरी गर्ने? भन्ने उनको प्रश्न थियो। उनले लोकतन्त्र जोगाउनका लागि फेरि आन्दोलनको विकल्प नदेखिएको धारणा पनि सार्वजनिक गरे।
देशको निर्वाचन प्रणालीले मिलीजुली सरकार बनाउने बाध्यता सृजना गरेकोप्रति उनले औँला ठड्याउँदै यस्तो स्थितिमा पार्टीहरूको मूल सिद्धान्त र व्यवहार त्याग्न नहुनेमा जोड दिए।
सम्मान समारोहमा राजनीतिका क्षेत्रमा हरि सापकोटालाई २१ हजार रुपैयाँ नगदसहित सम्मान गरिएको थियो भने सामाजिक सेवामा उल्लेखनीय योगदान पु¥याएका अलिम अन्सारीलाई ११ हजार रुपैयाँसहित सम्मान प्रदान गरियो। यस्तै, प्रतिभा क्षेत्रतर्फ डा. प्रमिला गच्छेदारलाई नेता डा. कोइरालाले सम्मानपत्र प्रदान गरे।
प्रकाशित मिति: १८ श्रावण २०८२, आईतवार
