३१ असार २०८२, मंगलवार
काठमाडौँ। नेकपा (माओवादी केन्द्र)का सांसद माधव सापकोटाले सरकारले संसदलाई अवमूल्यन गर्ने तथा संसदीय प्रणालीमाथि छेडखानी गरिरहेको आरोप लगाएका छन् ।
मंगलवार संसद भवन परिसरमा सञ्चारकर्मीहरुसँग कुराकानी गर्दै सांसद सापकोटाले यस्तो आराप लगाएका हुन् । उनले सरकारको व्यवहारले संविधान र व्यवस्थाप्रति जनतामा अरुची र संकट पैदा हुँदै गएको टिप्पणी गरे । सरकार आफ्नो उद्देश्य पूरा गर्न सफल भएपनि राष्ट्र, जनता, सुशासन, संविधानको संशोधन र समृद्धिको कोणबाट हेर्दा पुर्णतः असफल भएको उनको भनाइ छ । सांसद सापकोटाले सरकारले तत्कालीन पुष्पकमल दाहाल नेतृत्वको सरकारले ल्याएको बजेट चलाएको उल्लेख गर्दै आर्थिक सुधारको संकेत देखिएपनि तत्कालीन सरकारलाई धन्यावाद दिनुपर्ने बताए ।
उनले भने, ‘संसद विघटन गरेको पृष्ठभूमि भएको नेताले सरकारको नेतृत्व गरिराख्नु भएको छ । सरकारले संसदलाई अवमूल्यन गर्ने, हेप्ने, संसदीय प्रणालीलाई छेडखानी गर्ने काम गरिराखेको छ । यो राम्रो भएन । यसले संसद मात्रै होइन व्यवस्थामाथि अरुची र संकट पैदा गर्दछ । यो सरकार जे उद्देश्य प्राप्तिको लागि गठन भएको छ त्यो उद्देश्य प्राप्तिमा सफल छ । राष्ट्र, जनता, सुशासन, संविधानको संशोधन र समृद्धिको कोणबाट हेर्दा पूर्णतः यो सरकार असफल छ । यो सरकार बजेट कार्यान्वयनले मुलुकमा आर्थिक सुधारका संकेतहरु देखिए भन्दै हिँडेको छ । यदि त्यसो हो भने त तत्कालिन सरकारलाई धन्यावाद दिनुपर्छ नि । यो सरकार भ्रष्टाचारका काण्डै काण्डमा अल्मलियो, सरकारले जनताकाप्रति उत्तरदायी भएर केही पनि काम गरेन ।’
सरकार भ्रष्टाचारमा अल्मलिएको कारण जनताप्रति उत्तरदायी हुन नसकेको उनको टिप्पणी छ ।
प्रकाशित मिति: ३१ असार २०८२, मंगलवार
