२९ असार २०८२, आईतवार
काठमाडौँ। नेपाली राष्ट्रिय महिला क्रिकेट टोलीकी अलराउण्डर पूजा महतो भिरा एजुकेशन कन्सल्टेन्सी प्रा.लि.को ब्राण्ड एम्बेसडरमा नियुक्त भएकी छन् ।
काठमाडौंमा आईतवार एक कार्यक्रमकाबीच भिराले नेपाली महिला क्रिकेट टोलीकी उपकप्तानसमेत रहेकी पूजालाई खेलाडी करियर रहेसम्मका लागि आफ्नो ब्राण्ड एम्बेसडरमा नियुक्त गरेको हो । सम्झौता पत्रमा भिराकी संस्थापक प्रबन्ध निर्देशक रेश्मा महर्जन र पूजाबीच हस्ताक्षर भएको हो । भिराले नेपाली यु–१९ महिला क्रिकेट टोलीकी कप्तानसमेत रहेकी पूजालाई क्रिकेट करिअरका भरको लागि नियुक्त गरेको हो । सम्झौतापत्रको रकम भने खुलाएको छैन । सो कार्यक्रममा नेपाल क्रिकेट संघ (क्यान) का अध्यक्ष चतुरबहादुर चन्द, क्यानका उपाध्यक्ष रोशन सिंह, शैक्षिक परामर्श व्यावसायिक महासंघका अध्यक्ष राजेन्द्र बराल र इक्यानका अध्यक्ष शेषराज भट्टराईलगायत उपस्थित थिए ।
भिराकी संस्थापक प्रबन्ध निर्देशक रेश्मा महर्जनले देशका लागि योगदान पुर्याउँदै आएको धेरै छोरीहरूलाई प्रोत्साहित गरिरहने बताइन् । पूजाले यस किसिमको सहकार्यले एउटा खेलाडीलाई आफ्नो क्रिकेट करियर अगाडि बढाउने ठूलो मद्दत पुग्ने आशा व्यक्त गरिन् । उनले आफूलाई यहाँसम्म आइपुग्न सहयोग गर्ने क्यानका उपाध्यक्ष रोशन सिंहलाई धन्यवाद पनि दिए । क्यानका अध्यक्ष चतुरबहादुर चन्दले पछिल्ला समय नेपालका एजुकेसन कन्सल्टेन्सीले नेपाली क्रिकेटरहरूको आत्मबल बढाउन काम गरिरहेको आभार व्यक्त गर्दै पूजालाई खेल करियरभरका लागि आबद्ध गर्नु सुखद पक्ष रहेको बताए ।
उनले खेलाडीहरूलाई प्रोत्साहित गर्नु भनेको समग्र नेपाली क्रिकेटको विकासमा नै एउटा इट्टा थप्ने काम भएको बताए । साथै क्यान अध्यक्ष चन्दले नेपाल प्रिमियर लिग (एनपिएल) का आएका विवाद छिटै समाधान हुने विश्वास व्यक्त गरेका छन् । पूजाले सन् २०२३ मा आइसिसी महिला टी ट्वान्टी एसिया क्वालिफायरमा हङकङसँगको खेलमा डेब्यु गरेका थिइन् । उनकै कप्तानीमा नेपालले सन् २०२४ को नोभेम्बरमा यु–१९ महिला टी ट्वान्टी विश्वकपमा स्थान बनाएको थियो । पूजाले यसै क्वालिफायरमा कुवेतविरुद्ध ६९ बलमा १३० रनको अविजित इनिङ खेलेकी थिइन् ।
सिनियर टोलीबाट पनि उनले टी ट्वान्टी आईमा ३७ खेल खेल्दै चार सय ३८ रन जोड्दा २७ विकेट लिएकी छन् । उनै पूजालाई क्रिकेट करियरभरका लागि भिराले आफ्नो ब्रान्ड एम्बेसडर नियुक्त गरेको हो । सोही कार्यक्रममा नेपाली क्रिकेट टोलीका पूर्वमुख्य प्रशिक्षक जगत टमटालाई सम्मान गरेको गरिएको थियो । नेपालको महिला, पुरुष र विभिन्न उमेरसमूहको क्रिकेट टोलीलाई प्रशिक्षक बनेका टमटालाई सम्मान गरिएको हो ।
प्रकाशित मिति: २९ असार २०८२, आईतवार
