३१ जेष्ठ २०८२, शनिबार
काठमाडौँ। नेपाल कम्युनिस्ट पार्टी (नेकपा) का महासचिव नेत्रविक्रम चन्दले नेपाली राजनीतिमा अब नयाँ वैकल्पिक धाराको खाँचो रहेको बताएका छन् ।
नेपाल समाजवादी पार्टी (नयाँ शक्ति)को १० औँ स्थापना दिवसको अवसरमा शुक्रवार काठमाडौंमा आयोजित कार्यक्रममा बोल्दै उनले यस्तो बताएका हुन् । उनले मुलुकको वर्तमान राजनीतिक चक्रले जनता वाक्क दिक्क भइसकेको बताए । उनले नेपाली राजनीतिमा एउटा चक्र घुमिरहेको र त्यसले आगामी परिमाण के आउँछ भन्ने सबै नागरिकलाई थाहा भइसकेको जिकिर गरे । उनले अहिलेको राज्यको नेतृत्वसँग कोही पनि आशावादी नरहेको जिकिर बताए । महासचिव विप्लवले जनतालाई नेतृत्वसहित नयाँ वैकल्पिक धारा र निकास चाहिएको बताए ।
उनले भने , “अब नयाँ वैकल्पिक अवश्य चाहिन्छ । एउटा ठूलो साइकलमा हामी घुमिरहेका छौँ । त्यो बाट जनता वाक्क दिक्क भइसके । एउटा साइकल चलिरहेको छ राजनीतिमा, अबको ६ महिना, एक वर्षमा के रिजल्ट आउँछ भन्ने हामीलाई राम्रोसँग थाहा छ । को मान्छे आउँछ र के हुन्छ भन्ने पनि राम्रोसँग थाहा छ । तर त्यो प्रति कोही आशावादी छैन । नेपाली राजनीतिका अबका दुई वर्षका परिणामहरू सबैलाई थाहा छन् । त्यसैले जनतालाई निश्चय पनि एउटा वैकल्पिक धारा तथा निकास चाहिएको छ, नेतृत्वसहित । जनताको ठूलो आशासहित, त्यो चाहिएकै छ । हामीले गर्नै पर्छ ।”
उनले समाजवादी सङ्घीयता आजको आवश्यकता भएको समेत जिकिर गरे ।
प्रकाशित मिति: ३१ जेष्ठ २०८२, शनिबार
