१६ जेष्ठ २०८२, शुक्रबार
काठमाडौँ। सत्य निरूपण तथा मेलमिलाप आयोग, नेपालका अध्यक्ष महेश थापाले आफूहरूको सन्देश सबै पालिकामा पुगोस् भन्ने सोच राखेको बताएका छन् ।
शान्ति प्रक्रिया, सङ्क्रमणकालीन न्यायका सम्बन्धमा हालसम्म भएका काम कारबाही र आयोगहरूको भावी कार्य योजना बारे छलफल गर्न शुक्रवार सिंहदरबारमा बसेको राष्ट्रिय सभाअन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा बोल्दै उनले यस्तो बताएका हुन् । आयोगले तीन महिनाको अवधि दिएर नयाँ उजुरी सङ्कलन गर्ने काम थालेको छ । उनले आफूले निर्देशन नभई सहजीकरण बाट काम गर्ने विश्वास व्यक्त गरे । उनले आयोगको सूचना तथा सन्देश ७७ वटै जिल्लाहरूमा पुगेको बताए । उनले उजुरी के कति आउँछन् भन्दा पनि उक्त सूचना देशभरका सबै पालिकाहरूसम्म पुगोस् भन्ने चाहेको बताए ।
उनले भने “अहिलेसम्म मैले निर्देशित होइन कि, मैले खोज्दा पनि नपाएको अवस्था छ कि ? मैले निर्देशन माग्दिन सहजीकरण गर्छु । सहजीकरण पाइराको छैन कि, त्यो पनि बिस्तारै होला । हामीले त्यसलाई पालिकासम्म पुगोस् भन्ने सोच राखेका छौँ, ७७ वटै जिल्लाहरूमा पुगेको होला हाम्रो सन्देश । कति पीडित होलान्, कति आउला, नआउला दोस्रो अर्को पक्ष भयो । तर, प्राइमरी कुरा के हो भने ७७ वटै जिल्ला र अन्य पालिकाहरूमा हाम्रो सन्देश पुगोस् भन्ने सोच छ ।”
उनले आयोगको काम अड्किएको कुरामा दुई मत नरहेको तर कामै भएको छैन भन्नु सही नभएको बताए । उनले केही काम आफूहरूले चाहँदा पनि हुन नसकेको बताए।
प्रकाशित मिति: १६ जेष्ठ २०८२, शुक्रबार
