२७ भाद्र २०८१, बिहीबार
काठमाडौं। नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहालले गणतन्त्रको मुलधार माओवादी आन्दोलन भएको बताउदै युरोपतिर भएको भए माओवादी आन्दोलनले नोबेल पुरस्कार पाउने विषय भएको बताएका छन् ।
बिहीवार टेलिश्रृंखला राधाकृष्णको पहिलो एपिसोडको शुभारम्भ कार्यक्रममा बोल्दै अध्यक्ष दाहालले यस्तो दाबी गरेका हुन् । उनले माओवादी आन्दोलन वा नेकपा माओवादी मुलधारमा आएपछि भन्ने शब्द प्रयोग भएको भन्दै माओवादी मुलधारमा आएको हो वा माओवादीले मुलधार क्रिएट गरेको हो भन्नेकुरा राजनीतिक बहसको विषय रहेको बताए ।
अध्यक्ष दाहालले संघीय लोकतान्त्रिक गणतन्त्रको मुलधार माओवादी भएको बताउदै गणतन्त्रको घोषणासँगै देशको सबैभन्दा ठूलो पार्टी पनि माओवादी भएको स्मरणगरेका छन् । माओवादीको गणतन्त्रात्मक मुलधारमा अन्य दल आएका हुन् की माओवादी संवैधानिक राजतन्त्रको मुलधारमा गएको हो भन्ने विवाद वैचारिक क्षेत्रमा, राजनीतिक क्षेत्रमा अहिले पनि रहेको बताए ।
अध्यक्ष दाहालले भने, ‘यहाँ अघि भनियो, माओवादी आन्दोलन वा नेकपा माओवादी मुलधारमा आएपछि भन्ने शब्द प्रयोग भयो । यो विषय धेरै ठूलो गम्भीर महत्वको छ । हामी मुलधारमा आयौँ की हामीले मुलधारा क्रिएट ग¥यौँ भन्ने विषय निकै ठूलो बहसको विषय हो । कुन मुलधार । संवैधानिक राजतन्त्रवालालाई मुलधार भनेको हो की गणतन्त्रको मुलधार ? गणतन्त्रको मुलधार त माओवादीका कारणले नै जन्मिएको हो । संघीय लोकतान्त्रिक गणतन्त्रको मुलधार । गणतन्त्रको घोषणासँगै देशको सबैभन्दा ठूलो पार्टी पनि माओवादी नै भएको हो । माओवादीको गणतन्त्रात्मक मुलधारमा अन्य दल आएका हुन् की माओवादी संवैधानिक राजतन्त्रको मुलधारमा गएको हो भन्ने विवाद वैचारिक क्षेत्रमा, राजनीतिक क्षेत्रमा निकै ठूलो छ । तपाईंहरुले बनाउने यो टेलिश्रृंखलाले यथार्थलाई उद्बोधन गर्नेछ ।’
अध्यक्ष दाहालले जनयुद्धको विषयलाई लिएर माओवादीले बनाएका चलचित्र र टेलिफिल्म जनतामा स्थापित हुन नसकेको बताए । उनले माओवादी नभएकाले बनाउन लागेको सो टेलिश्रृंखला जनताले हेर्ने विश्वास गर्दै उनले पृथ्वीनारायण शाहपछि आम नेपाली जनताको सबैभन्दा ठूलो उपस्थिति भएको आन्दोलन माओवादी आन्दोलन नै भएको जिकिरसमेत गरेका छन् ।
प्रकाशित मिति: २७ भाद्र २०८१, बिहीबार
