२६ असार २०८१, बुधबार
काठमाडौँ । राजनीतिक दलहरूबीच अबको सरकार संविधानको धारा ७६ को उपधारा २ अन्तर्गत बन्ने कि ३ अन्तर्गत भनेर बहस चलिरहेका बेला राष्ट्रपति रामचन्द्र पौडेलले अन्यौल प्रकट गरेका छन् ।
गृहजिल्ला तनहुँको एक टोलीसँगको बुधबार शीतल निवासमा भएको अनौपचारिक भेटघाटमा राष्ट्रपति पौडेलले संविधानको कुन धाराअन्तर्गत नयाँ सरकार गठन हुन्छ भन्नेबारे अन्यौल व्यक्त गरेको एक सहभागीले बताए । प्रधानमन्त्रीले विश्वासको मत नपाएपछि नयाँ प्रधानमन्त्री नियुक्तिमा राष्ट्रपतिको चासो रहेको छ । शीर्ष नेताहरूसँग आफ्नो संवाद हुन नसकेका कारण अब विश्वासको मतको प्रक्रिया सकिएपछि नै त्यसबारे छलफल हुने विश्वास उनको छ ।
भेटका सहभागीका अनुसार राष्ट्रपतिले शीर्ष नेताहरूसँग संवाद गर्न खोजेका छन् । यद्यपि काँग्रेस र एमालेले संविधानको धारा ७६ को उपधारा २ बमोजिम नियुक्त प्रधानमन्त्री प्रचण्डले एक महिनाभित्र विश्वासको मत पाइसकेको र यसबीचमा चौथोपटक विश्वासको मत लिन लागेकाले अब धारा ७६ को उपधारा ३ आकर्षित नहुने बताएका छन् ।
धारा ७६ को उपधारा ४ बमोजिम विश्वासको मत लिन नसक्दा मात्र उपधारा ३ बमोजिम ठूलो दलको नेता प्रधानमन्त्री हुने संवैधानिक व्यवस्था छ । तर, यसपटक प्रधानमन्त्रीले धारा ७६ को उपधारा ४ बमोजिम नभएर धारा १०० को उपधारा २ बमोजिम विश्वासको मत लिन लागेका हुन् ।
प्रकाशित मिति: २६ असार २०८१, बुधबार
