११ माघ २०८०, बिहीबार
काठमाडौं। डोलिडार अन्तर्गतको रुरल कनेक्टिभिटी इम्प्रुभमेन्ट प्रोजेक्ट (आरसीआइपी) को परामर्शदाता छनोटमा चलखेल भएको आरोप लागेको छ ।
सहरी विकाश मन्त्रालय अन्तर्गतको डोलिडारको परामर्शदाता छनोटमा चलखेल गरेको भन्दै अख्तियार दुरुपयोग अनुसन्धान आयोगमा उजुरी परेको छ । उक्त उजुरीकर्ताले ‘चलखेलबारे छानबिन गर्न आग्रह’ गरेका छन् । एडीबीको ऋण सहयोगमा सञ्चालित कनेक्टिभिटी इम्प्रुभमेन्ट प्रोजेक्ट (आरसीआइपी) को परामर्शदाताका लागि ८० करोड बजेट विनियोजन गरिएको छ ।
त्यस्तै डोलिडारका आयोजना प्रमुख मोहनदत्त भट्ट र महानिर्देशक माधव भट्टराइले चलखेल गरेर इआरएमसी, इटेको र स्वाइल टेष्ट जेभीलाई परामर्शदाता छनोट गर्नेगरी काम गरेको उजुरकर्ताले जिकिर गरेका छन् । चलखेलबारे २०८० कार्तिक १६ मा उजुरी दर्ता गराए पनि आयोगले त्यसबारे छानबिनमा आनाकानी गरेको छ । जिम्मेवार अधिकारीहरूले परामर्शदाता छनोट सम्बन्धी गोप्य मापदण्ड नै बाहिर ल्याएको उजुरकर्ताको आरोप छ ।
परामर्शदाता सम्बन्धी आर्थिक प्रस्ताव माघ १४ मा खुल्दैछ । इन्भाइरोमेन्ट रिसोर्स मेनेजमेन्ट कम्पनी (ईआरएमसी) सिक्टा सिँचाइ आयोजनाले कालो सूचीमा राखेको कम्पनी हो । सो डोलिडार अन्तर्गतको रुरल कनेक्टिभिटी इम्प्रुभमेन्ट प्रोजेक्ट सडक आयोजना हो ।
सो आयोजनाले ३२ भन्दा बढी जिल्लाका ग्रामीण सडकको काम गरिरहेको छ ।
प्रकाशित मिति: ११ माघ २०८०, बिहीबार
