सर्वोत्तमको सिमेन्टको आईपीओ भर्ने म्याद थप

काठमाडौं। सर्वोत्तम सिमेन्टको आईपीओ भर्ने म्याद थप भएको छ । प्रभावित स्थानीयको कोटामा ९ लाख ३० हजार कित्ता सेयर छुट्याइको थियो, तर पर्याप्त मात्रामा आवेदन नपरेपछि माघ २५ गतेसम्मका लागि आवेदन भर्ने म्याद थप गरिएको बिक्री प्रबन्धक ग्लोबल आईएमई क्यापिटलले जनाएको छ ।

त्यस्तै, यसअघि माघ १० गतेसम्म समय तोकिएको थियो भने वैदेशिक रोजगारमा रहेकाहरूबाट भने पर्याप्त आवेदन परेको छ । प्रभावित स्थानीयका लागि राखिएको ३ वर्षको लकइन अवधि पनि आईपीओ नबिक्नुको मुख्य कारक बन्ने गरेको छ। बुक बिल्डिङ विधिबाट सर्वसाधारणका लागि यस कम्पनीको सेयर मूल्य प्रतिकित्ता ३६० रुपैयाँ ९० पैसा कायम भएको छ भने न्यूनतम ५० र अधिकतम १० हजार कित्तासम्मका लागि आवेदन दिन सकिनेछ ।

त्यस्तै, उद्योग क्षेत्र नवलपरासीको सुनवल नगरपालिकाका वडा नम्बरहरू ३,४,५,६,११ र १३ का स्थानीयले आईपीओमा आवेदन दिन पाउने छन् भने खानी क्षेत्र पाल्पा जिल्लाको रैनादेवी छहरा गाउँपालिकाका १ र २ नम्बर वडाका स्थानीयले आवेदन दिन सक्छन् ।

पाल्पा रिब्दिकोट गाउँपालिकाका २,३,४ र ६ नम्बर वडाका स्थानीय, तिनाउँ गाउँपालिकाका १, २ र ३ तथा निस्दी गाउँपालिका ७ नम्बर वडाका बासिन्दाले आईपीओमा आवेदन दिन सक्नेछन् ।