१० भाद्र २०८०, आईतवार
१० भदाै, झापा । नेकपा (एमाले)का अध्यक्ष एवं पूर्व प्रधानमन्त्री केपी शर्मा ओलीले देशमा विभिन्न प्रकारका साम्प्रदायिकता मच्चाउन खोजिएको भन्दै यसमा सचेत हुन आग्रह गरेका छन् । उनले सबै प्रकारको विभेद र असमानताको अन्त्यको पक्षमा आफू र पार्टी रहेको जनाउँदै अशान्ति नमच्चाउन आग्रह गरे ।
दूई दिन अघिदेखि गृह नगर झापामा रहेका ओलीले कोशी प्रदेश नामकरण तथा पहिचानको नाममा भइरहेको आन्दोलन हिंसात्मकतर्फ उन्मुख भएको बताउँदै यसले कसैलाई पनि फाइदा नपुग्ने बताए । ढुङ्गा हान्ने र अशान्ति मच्चाउने कार्य रोकेर साझा पहिचानको पक्षमा उभिन म सबैलाई आग्रह गर्दछु, उनले भने ।
आपसमा मारामार गरेर कसैलाई फाइदा नपुग्ने उनको भनाई थियो । कुनै समस्या भएमा वा चित्त नबुझेमा छलफल र बहसमा आउनु पर्ने बतााए। “हामी सबै प्रकारका असमानता र विभेद समाजबाट अन्त्य हुनुपर्छ भन्ने मान्यता राख्छौ । हरेकलाई सामाजिक न्याय र समानता प्राप्त हुनुपर्दछ”, ओलीले भने ।
पूर्व प्रधानमन्त्री ओलीले प्रदेशको नामकरण ‘कोशी’ राख्दा सबैको पहिचान समेटिएको दाबी गरे । नेपालको सबैभन्दा होचो स्थान कचनकवलदेखि लिएर सबैभन्दा अग्लो चुचुरो सगरमाथासम्म रहेको प्रदेशको नामकरणमा कुनै जाती विशेष र थर विशेषले गर्नु उपयुक्त नहुने भएकाले यो उपयुक्त नाम भएको जनाए ।
प्रकाशित मिति: १० भाद्र २०८०, आईतवार
