२६ श्रावण २०८०, शुक्रबार
एजेन्सी । लामो समयदेखि मानिसलाई फिट रहन एक दिनमा १० हजार पाइला हिड्नुपर्छ भनिँदै आइएको थियो । तर, एक नयाँ अनुसन्धानले एक फिट रहनका लागि एक दिनमा ५ हजार पाइला हिड्नु पर्याप्त हुने देखाएको छ ।
विश्वभरका २ लाख २६ हजार भन्दा बढी मानिसहरूको विश्लेषणले एक दिनमा ४ हजार पाइला मात्रै हिड्नु पनि कुनै पनि कारणले अकालमै मृत्युको जोखिम कम गर्न पर्याप्त हुने देखाएको छ ।
त्यस्तै, २ हजार ३ सयभन्दा बढी पाइला हिड्दा रगत र मुटुसँग सम्बन्धित रोगको जोखिम कम गर्न पर्याप्त रहेको देखाएको छ । सो अध्ययनले जति पाइला हिँड्यो उत्ति नै फाइदा रहेको बताएको छ ।
४ हजारभन्दा माथि २० हजार पाइलासम्म हिँडिने प्रत्येक पाइलाहरूले चाँडै मृत्यु हुने जोखिम कम गर्ने बिबिसीमा उल्लेख गरिएको छ ।
पोल्याण्डको लड्जको मेडिकल युनिभर्सिटी र अमेरिकाको जोन्स हप्किन्स युनिभर्सिटी स्कूल अफ मेडिसिनको टोलीले हिड्ने फाइदाहरू सबै लिंग र उमेरका लागि लागू भएको पत्ता लगाएका छन् । तर, ६० वर्षभन्दा कम उमेर समूहका मानिसहरूका लागि हिड्नु अझै लाभदायक भएको बताइएको छ ।
लड्ज विश्वविद्यालयका प्रोफेसर मासीज बानाचले उपचारका लागि उन्नत औषधिहरूको संख्या बढ्दै गइरहेको बेला औषधिहरूमात्रै पर्याप्त नभइ व्यायाम महत्वपूर्ण भएको बताएका छन् ।
प्रकाशित मिति: २६ श्रावण २०८०, शुक्रबार
