Trending
>>   विदेशमा रहेका नेपालीको मताधिकार सुनिश्चित गर्न माग >>   राप्रपा अध्यक्षमा ज्ञानबहादुर शाहीको उम्मेदवारी घोषणा >>   नेपालको समृद्धि आयात बढाएर होइन, स्वदेशी उत्पादन बढाएर सम्भव छः मन्त्री साह >>   प्रधानमन्त्री साहको भारत भ्रमण मन्त्रिपरिषद्बाट स्वीकृत >>   प्रदेश र स्थानीय तहको निर्वाचन सँगै गर्नेबारे छलफलपछि मात्रै निष्कर्षमा पुग्छौंः रास्वपा >>   स्थानीय तह निर्वाचनबारे निर्वाचन आयोगद्वारा दलहरूसँग छलफल शुरु >>   जनकपुर–अयोध्या रेल र हवाई सेवा सञ्चालन गर्न प्रधानमन्त्रीलाई निधीको आग्रह >>   प्रधानमन्त्रीको भ्रमणमा मोदीको दिवाभोजदेखि नेपाल–भारत बिजनेस फोरमसम्म >>   प्रधानमन्त्री बालेन्द्र शाह आईतवार भारतको दुईदिने राजकीय भ्रमणमा जाने >>   वित्तीयि प्रणालीबाट २०० अर्ब निक्षेप खिच्दै राष्ट्र बैंक
Logo
४ मंसिर २०८३, शुक्रबार
४ मंसिर २०८३, शुक्रबार

महामन्त्रीको उम्मेद्वारी दिँदै महालक्ष्मी उपाध्यायले भनिन्, ‘पार्टीभित्र महिलाहरुको अर्थपूर्ण सहभागिता हुन सकेको छैन’


महामन्त्रीको उम्मेद्वारी दिँदै महालक्ष्मी उपाध्यायले भनिन्, ‘पार्टीभित्र महिलाहरुको अर्थपूर्ण सहभागिता हुन सकेको छैन’

काठमाडौँ।नेपाली काँग्रेसकी नेतृ महालक्ष्मी उपाध्याय ‘डिना’ले पार्टीभित्र अझैपनि महिलाहरुको अर्थपूर्ण सहभागिता हुन नसकेको बताएकी छिन् ।

काँग्रेसको १५ औँ महाधिवेशनमा महिला तर्फबाट महामन्त्री पदमा उम्मेदवारी दिएपछि सञ्चारकर्मीहरुसँग कुरा गर्दै उनले यस्तो बताएकी हुन् । उनले पार्टीको शुद्धीकरणसँगै महिलासहित सबै समावेशी समूहको अर्थपूर्ण सहभागिता सुनिश्चित गर्न आफूले महामन्त्री पदमा उम्मेदवारी दिएको बताइन् । पार्टीले संविधानमा स्वीकार गरेको समावेशी सिद्धान्तलाई व्यवहारमा कार्यान्वयन गर्न नसकेको उनको भनाई छ । काँग्रेसले लिएको समावेशी सिद्धान्तलाई पार्टीको संगठनमा समेत प्रत्याभूत गर्नुपर्नेमा उनले जोड दिएकी छिन् । सबै समूह र विचारलाई समेट्ने पार्टी निर्माण आफ्नो मुख्य प्रतिबद्धता रहेको उनको भनाई छ ।

उनले भनिन् , ‘नेपाली काँग्रेस पार्टीको शुद्धिकरण, सङ्गठन शुद्धिकरण र महिलाहरूको नेतृत्व तहमा पुगेर महिलाहरूको सहभागिता, अर्थपूर्ण सहभागिताको लागि मैले महामन्त्रीमा उम्मेद्वारी दिएको हुँ । महिलाहरूको अधिकारलाई संरक्षण गर्दै हिजो हामीले संविधान सभामा बसेर लेख्यौँ । तर पार्टी भित्र महिलाहरूको अर्थपूर्ण सहभागिता नहुँदा कार्यान्वयन पक्ष फितलो भएको छ । नेपाली काँग्रेसले लिएको सिद्धान्त भनेको समावेशीको सिद्धान्त हो, त्यही नेपाली काँग्रेसको सिद्धान्तलाई नै अहिले हामीले संविधानमा लेख्यौँ तर पार्टीमा हामीले त्यसलाई प्रत्याभूति गराउन सकेनौँ । त्यसकारण मेरो प्रतिबद्धता भनेको तमाम समावेशीहरूको सबैको विचार सबैको विचारलाई समेट्ने एउटा पार्टी बनाउनुपर्छ भन्ने हो ।’

उनले देशभरबाट आएको माग र आवश्यकता सम्बोधन गर्न कांग्रेसको पदाधिकारी र केन्द्रीय सदस्यको संख्या बढाइएको बताएकी छिन् । यस सन्दर्भमा पार्टीभित्र भने आलोचना भइरहेको उनको भनाई छ । यदपी अन्य राजनीतिक पार्टीको तुलनामा भने अझै पनि काँग्रेसको संख्या कम रहेको उनको दाबी छ । ठूलो संख्याको केन्द्रिय समितिले प्रभावकारी रूपमा काम गरेर पार्टी निर्माणमा परिणाम दिनसके त्यसप्रतिको विरोध अन्त्य हुने उनले बताएकी छिन् ।

उनले भनिन्, ‘अहिलेको आवश्यकता र माग बमोजिम देशभरीबाट केन्द्रिय समितिमा काम गर्छु भन्नेको संख्या बढेको भएर केही संख्या बढाइएको हो । अन्य राजनीतिक पार्टीभन्दा हाम्रो कमै छ, अहिले पनि । अन्य राजनीतिक पार्टीको तुलना गर्ने हो भने हाम्रो सङ्ख्या अहिले पनि कम छ तर यसलाई पक्कै पनि तपाईंले भनेको केही ठुलो भयो भन्ने जनआवाज छ, पार्टी भित्र आवाज उठेको छ । भोलि यति सङ्ख्याले काम गर्दा साँच्चिकै पार्टी बन्दो रहेछ भन्ने प्रत्याभूति गराउन सकियो भने यो विरोधाभास अन्त्य हुन्छ ।’

उपाध्याय १४ औँ महाधिवेशनबाट सहमहामन्त्रीमा निर्वाचित हुनभएको थियो । यसअघि सहमहामन्त्री भएर काम गरिसकेकोले अहिले महामन्त्री पदमा आफ्नो दाबी स्वभाविक रहेको उनको भनाई छ ।


प्रकाशित मिति: २० आश्विन २०८३, मंगलवार

यो खबर पढेर तपाईलाई कस्तो महसुस भयो ?