१० आश्विन २०८२, शुक्रबार
काठमाडौँ। नेकपा (माओवादी केन्द्र) का नेता वर्षमान पुनले देशको स्वाधिनता गम्भीर अवस्थामा रहेको बताएका छन् ।
शुक्रवार काठमाडौंमा सम्पन्न केन्द्रिय समितिको बैठकपछि सञ्चारकर्मीहरुसँग कुरा गर्दै उनले यस्तो बताएका हुन् । उनले देश रहे र लोकतन्त्र रहे मात्रै प्रतिष्पर्धा गर्न सकिने भन्दै सबै राजनीतिक दलहरुले रुपान्तरणबारे सोच्नुपर्ने बताएका छन् । अहिलेसम्मका आन्दोलनको उपलब्धिको रक्षा, देशको स्वाभिमान र स्वाधिनता बचाउन जरुरी रहेको बताए। आजबाट आफूहरु पदाधिकारी नभइ महाधिवेशन आयोजक समितिको सदस्य भएको बताएका छन् । जेन जी आन्दोलनको मुल उद्देश्यलाई आत्मसाथ गरेर आफूहरुले यो निर्णय लिएको उनको दाबी छ ।
उंहाले भने, ‘हामी सबै महाधिवेशन आयोजक समितिको सदस्य भएका छौँ । पार्टीले जेन जी आन्दोलनको मुल स्पिरिट, पार्टीलाई लोकतान्त्रिकरण, शुद्धिकरण अझ नयाँ बनाउनुपर्छ । र जेन जी युवासहितको पार्टी बनाउनुपर्छ भन्ने स्पिरिटलाई सबैभन्दा पहिला अघि बढेर आत्मसाथ गरेको छ । यो जेन जी आन्दोलनका शहीदहरुप्रतिको सम्मान हो । घाइते अपांगता भएकाहरुप्रति को सम्मान हो । जसले आफ्नो आवाज व्यक्त गर्नुभएको छ, उहाँहरुप्रतिको सम्मान हो । हामी अरु पार्टीहरुलाई पनि भन्न चाहन्छौँ, पार्टी रुपान्तरण गर्नुस् देशको स्वाभिमान, स्वाधिनता, लोकतन्त्रको लागि सँगै काम गर्नुछ । देश रह्यो, लोकतन्त्र रह्यो भने प्रतिष्पर्धा हुन्छ । सबैले लोकतान्त्रिकरण गरौँ, सुधार गरौँ । देशको स्वाधिनता निकै गम्भीर अवस्थामा छ । अहिलेसम्मका आन्दोलनका उपलब्धिहरुको रक्षा गर्ने, स्वाधीनता बचाउने, अझै अघि बढौँ, शासकीय प्रणालीमा सोचौँ ।’
नेकपा (माओवादी केन्द्र) को केन्द्रिय समिति बैठक बिहीवारदेखि काठमाडौंमा जारी थियो । अध्यक्ष दाहाल आगामी महाधिवेशनको उम्मेदवार नहुने, प्रतिष्पर्धा नै नगर्ने दाबी गरेका छन् ।
प्रकाशित मिति: १० आश्विन २०८२, शुक्रबार
