१४ माघ २०८०, आईतवार
काठमाडौं। राष्ट्रिय समाचार समिति (रासस) का कार्यकारी अध्यक्ष धर्मेन्द्र झाले रासस आफ्नो सेवालाई सन्तुलित, विश्वसनीय र भरपर्दो बनाउँदै नागरिकको सूसुचित हुने अधिकारलाई सुनिश्चित गर्न लागेको बताएका छन् ।
रासस कर्मचारी सङ्घको चौथो केन्द्रीय अधिवेशन तथा साधारणसभाको अवसरमा उनले उपलब्ध स्रोत साधनको भरपुर उपयोग गर्दै राससको समाचार सेवालाई गुणस्तरीय र प्रभावकारी बनाउन लागेको बताएका छन् ।
कार्यकारी अध्यक्ष झाले संस्था बलियो र विश्वसनीय भएमात्रै यसको गरिमा र महत्व बढ्ने भन्दै त्यसका निम्ति सम्पूर्ण पत्रकार कर्मचारी जिम्मेवापूर्वक लाग्न निर्देशन दिए । “राससको मुख्य दायित्व समाचार सेवा हो, समाचार बढी प्रयोग हुने वातावरण बनेको छ । समाचारको विविधता र गुणस्तर अभिवृद्धि भएको छ । अनौपचारिक समाचार र खोजी समाचारलाई बढी प्राथमिकता दिइएको छ, सेवाग्राहीले पछिल्लो राससको सामग्रीलाई रुचाएका छन् र सकारात्मक प्रतिक्रिया जनाइरहेका छन्”, उनले भने ।
त्यसैगरी, कार्यकारी अध्यक्ष झाले राससको सेवालाई थप प्रभावकारी बनाउन जनशक्तिको क्षमता अभिवृद्धिका लागि काम भइरहेको बताउदै । कर्मचारी सङ्घ सङ्गठनसँगको समन्वय र सहकार्यमा संस्थागत सुधार र सेवा सुदृढिकरणमा राससले फड्को उल्लेख गरे ।
राससका महाप्रबन्धक सिद्धराज राईले रासस व्यवस्थापनले उपलब्ध स्रोतसाधन र जनशक्तिको अधिकतम उपयोग गर्दै सेवालाई चुस्त र प्रभावकारी बनाउन लागिपरेको बताए । उनले राससका पत्रकार कर्मचारीको वृत्तिविकासलाई निरन्तर अगाडि बढाइएको, रासस ऐन, विनियमावलीलाई समय सापेक्ष बनाएर लैजान प्रक्रिया अगाडि बढाइएको जानकारी दिएका छन् ।
नेपाल पत्रकार महासङ्घ, रासस प्रतिष्ठान शाखाका अध्यक्ष पवित्रा गुरागाइँले राससको श्रीवृद्धिका लागि राससमा क्रियाशील सङ्घ सङ्गठनले रचनात्मक सहयोग गर्दै राससको सेवालाई प्रभावकारी बनाउन भूमिका खेल्नुपर्ने धारणा राखेका छन् ।
नेपाल राष्ट्रिय कर्मचारी सङ्गठन राससका अध्यक्ष प्रेमप्रसाद उपाध्यायले रासस व्यवस्थापन र कर्मचारी सङ्गठनबीच समन्वय र सहकार्यका साथ पत्रकार कर्मचारीको वृत्ति विकासका कामलाई आगामी दिनमा पनि निरन्तरता दिनुपर्ने बताए ।
सङ्घको अधिवेशनले नयाँ कार्यसमिति चयन गर्ने जनाइएको छ ।
प्रकाशित मिति: १४ माघ २०८०, आईतवार
