२४ फाल्गुन २०८१, शनिबार
काठमाडौँ। नेपाल सरकारले ‘राष्ट्रिय श्रम तथा रोजगार सम्मेलन–२०८१’ को तयारी अन्तिम चरणमा पुगेको जानकारी दिएको छ ।
शुक्रवार मन्त्रालयमा आयोजित पत्रकार सम्मेलनमा उक्त जानकारी दिएको हो । श्रम, रोजगार तथा सामाजिक सुरक्षा मन्त्री शरतसिंह भण्डारीले वैदेशिक रोजगारको विकल्प आन्तरिक रोजगार भएको बताएका छन् । उनले आन्तरिक रोजगारलाई प्रवद्र्धन गर्न मन्त्रालयमा आन्तरिक रोजगार महाशाखा स्थापना गरिएको बताए । उनले रोजगार महाशाखाको नेतृत्वमा आगामी दशकलाई उद्यमशील समाज निर्माण गर्ने बताउदै रोजगार सम्मेलनमा उद्यमशीलताका आधारमा रोजगारी सिर्जन गर्ने विषयमा छलफल हुने उनको भनाइ छ ।
उनले भने, ‘हामी आफैँले जुन किसिमको भाष्य निर्माण गरेका छौँ कि मुलुक खाली हुन थाल्यो, उत्पादनशील युवा बाहिर जान थाले, देशमा कहीँ केही छैन । सबै विदेश गए मुलुक खाली भयो भन्ने खालको भाष्य निर्माण भइरहेको छ । अहिलेको महत्वपूर्ण विषय भनेको वैदेशिक रोजगारको विकल्प भनेको आन्तरिक रोजगार नै हो, अर्को उपाय छैन । अहिले मन्त्रालयमा आन्तरिक रोजगार महाशाखा स्थापना भइसकेको छ । यसैले लिड गरेर मुलुकमा आन्तरिक रोजगारका सम्भावनालाई हेरेर आगामी दशकलाई उद्यमशिलताको आधारमा उत्पादनशिल समाज बनाएर उत्पादन बढाएर कसरी रोजगारी सिर्जना गर्न सकिन्छ भनेर छलफल गर्न खोजिएको छ ।’
सम्मेलनमा रोजगारी र उत्पादनशिलतामा सम्बन्धित तीनै तहका सरकार,निजी क्षेत्र, ट्रेड युनियन, श्रम तथा रोजगार विषयसँग सम्बन्धित व्यवसायी, अनुसन्धानकर्ता, विज्ञ विकास साझेदार, गैरसरकारी क्षेत्रका गरी पाँच सय युवाको सहभागिता रहने जनाइएको छ ।
प्रकाशित मिति: २४ फाल्गुन २०८१, शनिबार
