२३ फाल्गुन २०८१, शुक्रबार
काठमाडौँ। ऊर्जा, जलस्रोत तथा सिंचाईमन्त्री दीपक खड्काले कुलमान घिसिङलाई हटाउने वा नहटाउने विषयमा सरकारले सोधेको प्रश्नको जवाफ पर्खिरहेको बताएका छन् ।
शुक्रवार प्रतिनिधि सभा हल बाहिर पत्रकारहरुसँग बोल्दै मन्त्री खड्काले कुलमान घिसिङले विद्युत प्राधिकरणलाई नाफामा लगेको विषय सही हो वा होइन भन्ने छानविन गरेपछि थाहा हुने बताएका छन् । भारतले आफ्नो आवश्यकता हुँदा हुँदै नेपाललाई विद्युत दिएर सहयोग गरेको हिसाबले सोच्नुपर्ने बताउदै अहिले पनि एक हजार मेगावाट विद्युत भारतबाट आयात भइरहेको उनको भनाइ छ ।
उनले भने, ‘हट्नु हुन्छ कि हुन्न त्यो छलफलको विषय बाँकी छ, उहाँको उत्तर आएपछि भनौला नि, उत्तर पर्खिरहेका छौँ । आज पनि एक हजार मेगावाट भन्दा बढी विद्युत हामीले भारतबाटै आयात गरिरहेका छौँ । बेच्नेले बेच्दिनु पर्यो नि त, उहाँहरुको पनि आवश्यकता छ । उहाँहरुको आवश्यकता हुँदा हुँदै नेपालको सहयोगका लागि दिएको भन्ने पनि सम्झिनु पर्छ । त्यो पछि छानविनपछि थाहा हुन्छ । कर्मचारीहरु र सबैले अनुशासित र मर्यादित हुनुपर्छ ।’
कुलमान घिसिङको प्रगति विवरणमा शुन्य अंक पाएको विषयमा पत्रकारहरुले राखेको जिज्ञासामा मन्त्री खड्काले कर्मचारीहरु अनुशासित र मर्यादित हुनुपर्ने बताए ।
प्रकाशित मिति: २३ फाल्गुन २०८१, शुक्रबार
