२८ आश्विन २०८१, सोमबार
काठमाडौं । सर्लाही, चन्द्रनगर गाउँपालिका-२ बबरगंज चौरस्थित सोही गाउँपालिका-३ कामदटोल बस्ने नथुनि मुखिया बिनको माछाको दाना राख्ने कच्ची घरमा गए राति आगलागी हुँदा घर तथा घर भित्र रहेको माछाको दाना ३ सय ७० बोरा, मोटरसाइकल १ थान, पानी तान्ने मोटर २ थान, माछा मार्ने जाल लगायतका सामानहरू जलेर करिब १५ लाख रूपैयाँ बराबरको धनमाल नष्ट भएको छ ।
ललितपुर, ललितपुर महानगरपालिका-१८ पाखा गाउँस्थित सिराहा घर भएका निश्चल थापाको टहरोमा विद्युत सर्ट भई गए राति आगलागी हुँदा टहरो पूर्णरूपमा जलेर करिब ५ लाख ९५ हजार रूपैयाँ बराबरको धनमाल नष्ट भएको छ ।
दाङ, लमही नगरपालिका-९ अमिलियास्थित सडक छेउमा पार्किङ गरी राखिएको रा.१ त ३७७५ नम्बरको ट्याक्टरमा गए राति आगलागी हुँदा ट्याक्टरको अगाडीको भाग जलेर क्षति भएको छ । प्रहरीले स्थानीय बासिन्दा तथा दमकलको सहयोगमा आगलागी नियन्त्रणमा लिनुका साथै यस सम्बन्धमा आवश्यक अनुसन्धान गरिरहेको छ ।
प्रकाशित मिति: २८ आश्विन २०८१, सोमबार
