१५ असार २०८१, शनिबार
काठमाडौँ । काठमाडौँ महानगरपालिकाको वडा नं. ५ लाई सेरामिकका सामग्री उत्पादन गर्ने प्रविधि फर्नेस (भट्टी) हस्तान्तरण गरिएको छ । ४५ दिनको उच्च सिप तालिम समापनसँगै महानगरपालिकाकी उपप्रमुख सुनिता डंगोलले प्रविधि हस्तान्तरण गर्नुभएको हो ।
शुभारम्भसहित प्रविधि हस्तान्तरण कार्यक्रममा बोल्दै उपप्रमुख डंगोलले भन्नुभयो, ‘सिप सिकेर मात्र हुँदैन । यसमा निखार ल्याउन नियमित अभ्यास गर्नुपर्छ । नतिजाबाट प्रभाव देखिनु पर्छ । आउँदो तिहारसम्ममा वडा नं. ५ माटोको दियोमा आत्मनिर्भर हुनु पर्छ । अर्को बर्ष महानगरपालिका हुँदै अन्तरराष्ट्रिय स्तरमा पुग्ने गरी उत्पादन गर्नुपर्छ ।’
ठाउँ र स्थानीय रहनसहनसँग माटोका भाँडा बनाउने रैथाने सिप जोडिएको बताउँदै उहाँले, एक वडा एक नमूना कार्यक्रमबाट स्थानीय स्तरमा उद्यमशील क्रियाकलाप बढ्ने, यससँगै स्थानीयको आयआर्जन र जीवन स्तरमा सुधार हुने अवस्था निर्माणमा जोड दिनुभयो ।
त्यस क्रममा वडाध्यक्ष वीरेन्द्र प्रजापतीले भन्नुभयो, ‘सामाजिक विकासका कार्यक्रमअन्तर्गत सिपमूलक काम एउटा हो । समाजलाई गतिशील बनाउन, व्यक्तिलाई उद्यमशील बनाउन वडाले विधागत तालिमहरु सञ्चालन गरिरहेको छ । उद्यम गर्न सक्ने सबैका लागि अवसर प्रदान गर्ने वडाको योजना छ ।’
उहाँका अनुसार पहिलो चरणमा ५० जनालाई आधारभूत तालिम दिइएको थियो । उहाँहरुमध्ये इच्छुक र सिप योग्यता पुगेका १५ जनालाई उच्च सिप प्रशिक्षण दिइएको हो ।
प्रकाशित मिति: १५ असार २०८१, शनिबार
